Туркиянинг Адияман провинциясида зилзила оқибатида вайрон бўлган 6 та уйнинг қурувчи-пудратчиси ҳибсга олинди
Адияман прокуратурасига кўра, дастлабки маълумотларга кўра, Шукру Ишитмен томонидан қурилган уйлар вайроналари остида 123 киши ҳалок бўлган.
Ишитмен ҳибсга олинган ва Бесни ҳудудига олиб кетилади. Мазкур ҳолат юзасидан тергов ҳаракатлари давом этмоқда.
Anadoly агентлиги маълумотларига кўра, зилзиладан жабр кўрган провинцияларда зилзила билан боғлиқ жиноятларни тергов қилиш бўлимлари ташкил этилади.
Аввалроқ Туркияда зилзила пайтида қулаган бинолардаги қурилиш нуқсонлари туфайли саккиз киши ҳибсга олингани хабар қилинганди. Туркиянинг Хатай провинциясидаги зилзилалардан сўнг бутунлай вайрон бўлган Rönesans Rezidans турар-жой мажмуаси бош архитектори мамлакатдан қочишга уринган вақтда Истанбул аэропортида қўлга олинди.
Ўтган душанба, 6 феврал куни Қаҳраманмарашда ўчоғи етти баллдан ортиқ (маҳаллий вақт билан соат 04:17 да – 7,7 балл ва 13:24 да – 7,6 балл) бўлган иккита зилзила содир бўлди. Зилзила ортидан юзлаб ер ости силкинишлари мамлакатнинг 10 провинциясида, шунингдек, қўшни давлатлар, жумладан Сурияда ҳам сезилган.
Президент Режеп Таййип Эрдоған Туркияда табиий офат қурбонлари муносабати билан етти кунлик миллий мотам эълон қилди. Туркия давлат байроқлари бутун мамлакат бўйлаб ярмига туширилди.
Вайронкор зилзила қўшни мамлакатларда, жумладан Сурия, Ливан, Шимолий Кипр Турк Республикаси, Греция Кипри ва Ироқда ҳам сезилди.
Айни пайтда ўчоғи Туркиянинг Қаҳраманмараш шаҳрида содир бўлган вайронкор зилзила қурбонлари сони 31 минг кишидан ошди.
Фото: Anadoly агентлиги
