Туркияга киришда хорижликлардан бармоқ изи олинади
ANKARA. Kazinform – Эндиликда хорижий давлат фуқароларидан Туркияга киришда бармоқ излари олинади. Бу ҳақда мамлакат Ички ишлар вазири Али Ерлиқоя маълум қилди.
Вазир Ерлиқоя келгуси даврда амалга ошириладиган муҳим лойиҳани эълон қилар экан, эндиликда АҚШ ва Англияда бўлгани каби Туркияга кириш ҳам бармоқ излари орқали тасдиқланишини маълум қилди.
Шунингдек, вазир хорижликларни қонун доирасида Туркияга келишларини таъминлаш мақсадида олиб борилган ишлар ҳақида баёнот берди. Унга кўра, Туркияга яшаш мақсадида келган чет эл фуқаролари нотариуслар орқали яшаш рухсатномасини олишлари мумкин.
Бундан ташқари, мамлакатга ўқиш учун келган чет эллик талабалар миграция бошқармасига бормасдан, университет орқали яшаш учун ариза беришлари мумкинлиги ҳам таъкидланди.
