Туркияда биринчи сузувчи электр станцияси очилади
ASTANA. Kazinform - Элазиг вилоятида жойлашган Туркиянинг биринчи сузувчи қуёш электр станцияси июнь ойида ишлаб чиқаришни бошлайди. Бу ҳақда Туркиянинг Элазиғдаги 9-чи минтақавий сув ресурслари бошқармаси (DSİ) маълум қилди, дея хабар беради Kazinform Trendга таяниб.

Фатмали қишлоғи яқинидаги Кебан сув омборида қуввати 1 мегаватт бўлган “Кузова” сузувчи қуёш электр станцияси ўрнатилди.
Ушбу сузувчи қуёш электр станцияси Кузова насос станцияси ёнида ўрнатилган 2 мегаватт қувватга эга қуруқликдаги қуёш электр станцияси билан биргаликда Кебан кўли соҳилидаги етти қишлоқда 4,7 минг гектарга яқин ерни суғориш учун электр энергияси ишлаб чиқаради.
Лойиҳа фермерларнинг ерларини суғориш учун зарур бўлган электр энергияси харажатларини камайтириш учун қайта тикланадиган қуёш энергиясидан фойдаланишга қаратилган.
Туркиянинг биринчи сузувчи қуёш электр станцияси йилига 1 миллион 806 минг киловатт-соат энергия ишлаб чиқаради.
Сузувчи қуёш электр станцияси 15 минг квадрат метр майдонда жойлашган 2 мегаватт қувватга эга қуруқликдаги қуёш электр станцияси билан биргаликда қарийб 4,7 минг гектар ерни суғориш учун электр энергиясига бўлган эҳтиёжнинг қарийб 40 фоизини қоплайди.
Trend ҳамкор агентлиги томонидан Кazinform учун махсус тақдим этилган.