Туркия президенти Греция бош вазири билан учрашди
ASTANA. Kazinform – Туркия ва Греция мураккаб вазиятлар давридан сўнг икки томонлама муносабатларни йўлга қўймоқда. Бу давлатлар НАТОга аъзо бўлишларига қарамай, узоқ вақтдан бери Эгей денгизидаги чегаралар, Кипрнинг ҳудудий бўлиниши ва минтақадаги ноқонуний миграция билан боғлиқ вазият ҳақида баҳсли.
Кеча Греция Бош вазири Кириакос Мицотакис Анқарага ташриф буюриб, Туркия президенти Режеп Таййип Эрдоған билан учрашди. Бунгача икки давлат раҳбарлари 2023 йил декабрида Р.Т.Эрдоғаннинг Афинага ташрифи чоғида учрашган. Умуман олганда, бу уларнинг бир йил ичида тўртинчи учрашуви.
Эрдоған таклифи билан Анқарага келган Мицотакиснинг сафарида Туркия ва Греция ўртасидаги турли соҳалардаги икки томонлама муносабатлар муҳокама қилинди. Томонлар ҳамкорликни ривожлантириш бўйича келгусидаги мумкин бўлган қадамларни муҳокама қилдилар. Шу билан бирга, томонлар долзарб минтақавий ва глобал муаммолар юзасидан фикр алмашдилар. Икки томонлама муносабатларнинг шартномавий асосларини мустаҳкамлашга хизмат қилувчи битимларни имзолаш масаласи ҳам кун тартибидан ўрин олди.
Раҳбарларнинг фикрича, иқтисодиёт, савдо, туризм, соғлиқни сақлаш ва транспорт каби соҳаларда ҳамкорлик чуқурлашади.
Туркиялик кузатувчиларга кўра, Анқарадаги икки томонлама мулоқотлар Эрдоғаннинг 7 декабрь куни Афинага ташрифининг давоми сифатида кўрилади. Кейинчалик имзоланган “Афина дўстлик ва дўстона қўшнилик декларацияси” ҳам Анқарада бўлиб ўтаётган музокараларнинг асоси сифатида кўрилмоқда.
Ушбу ҳужжат имзолангандан сўнг ҳар икки томон дўстона муносабатлар, ўзаро ҳурмат, тинч-тотув яшаш ва ўзаро тушунишни ривожлантиришга келишиб олдилар. Шу билан бирга, томонлар ўртасидаги барча келишмовчиликлар халқаро ҳуқуқ меъёрлари асосида тинч келишувлар йўли билан ҳал этилиши лозимлиги таъкидланади.
