Туркия парламенти Швециянинг НАТОга аъзо бўлишини маъқуллади

АNKARА. КАZINFORM - Туркия парламенти бир неча бор ортга сурилган масалага нуқта қўйди. Депутатлар Швециянинг НАТОга киришини кўпчилик овоз билан маъқулладилар (287 овоз, 55 овозга қарши), деб хабар беради BBC.

Яқин кунларда Туркия президенти Режеп Таййип Эрдоған ратификация ҳужжатини имзолаши кутилмоқда.

Ўнлаб йиллар давомида ҳарбий иттифоқларга қўшилмаган Швеция 2022 йилда Россиянинг Украинага қарши агрессияси бошланганидан кейин Финляндия билан биргаликда НАТОга аъзо бўлиш учун ариза берган эди.

НАТО аъзоларининг аксарияти ҳар икки давлатнинг иттифоққа аъзолигини тезда ратификация қилди, бироқ Швецияни Курдистон Ишчилар партияси аъзоларига бошпана берганликда айблаган Туркия бу жараённи кечиктирди.

Натижада Финляндия ўтган йилнинг апрель ойида НАТОга тўлақонли аъзо бўлди, Швеция эса аъзо бўлиш жараёнини ҳали якунлагани йўқ.

“Бугун биз НАТОнинг тўлиқ аъзолигига бир қадам яқинлашдик”, - деб ёзди Швеция бош вазири Ульф Кристерссен ижтимоий тармоқда.

Швециянинг сўрови Венгрия томонидан ҳали ратификация қилинмаган: мамлакат бош вазири Виктор Орбан сешанба куни ҳамкасбини ушбу масала бўйича музокаралар учун Будапештга таклиф қилди.

Бироқ Швеция ташқи ишлар вазири Тобиас Билльстрем Венгрия томони билан ҳозир бирор нарсани муҳокама қилиш учун асос кўрмаётганини айтди.

НАТО Бош котиби Йенс Столтенберг Туркия парламентининг қарорини олқишлади ва келажакда Венгрия ҳам Стокгольм сўровини қўллаб-қувватлашига умид билдирди.

“Мен Венгриядан ратификацияни имкон қадар тезроқ якунлашини кутаман. Бу Швециянинг аъзолиги НАТОни мустаҳкамлайди ва барчамизни хавфсизроқ қилади”, - деди у.