Туркистондан Астана шаҳрига «Бірлік керуені» келаяпти
TÜRKISTAN. Кazinform - 8-13 сентябрь кунлари Астана шаҳрида V Бутунжаҳон кўчманчилар ўйинлари бўлиб ўтади. Шу муносабат билан Туркистон вилоятида «Бірлік керуені» (“Бирлик карвони”) лойиҳаси ташкил этилиб, пойтахтга йўл олди.
Тадбир давомида Туркистон вилояти ҳокими ўринбосари Ертай Алтаев Қозоғистон Республикаси терма жамоаси аъзоси, Хожа Аҳмад Яссавий мақбараси ичидаги Қудуқхона булоғидан сув тўлдирилган идишни Ғалимжон Ижановга топширди.
“Бутунжаҳон кўчманчилар ўйинларининг йўналиши спорт, маданий ва илмий дастурларга мувофиқ амалга оширилади. Шу боис муҳим тадбирда нафақат вилоят спортчилари, балки маданият ва фан намояндалари ҳам иштирок этади. Мазкур лойиҳада ҳар бир вилоятнинг таниқли спортчилари бошчилигидаги карвон маҳаллий ҳудуддаги табаррук булоқ ва қудуқлардан сув олиб, махсус юкхонада Астана шаҳрига етказилади. Шу муносабат билан сув олиш маросими учун Туркистон шаҳридаги Хожа Аҳмад Яссавий мақбараси ичидаги Қудухона булоғи танланди. Айни дамда спортчиларимиз бошчилигидаги махсус гуруҳ қудуқдан сув олиб олдингизга келди. Шу муносабат билан кўчманчилар ўйинлари бўлиб ўтадиган бош майдонга вилоятнинг илиқ саломи ва муқаддас сув етказадиган карвонга омад тилайман! Ушбу мусобақада юрт шарафини ҳимоя қилаётган вилоят спортчилари қониқарли натижа кўрсатишига ишонаман”, – деди Ертай Алтаев.
Эслатиб ўтамиз, V Бутунжаҳон кўчманчилар ўйинлари спортнинг 21 тури бўйича ўтказилади. Унда дунёнинг 89 давлатидан 2000 га яқин спортчи, мураббий ва вакиллар иштирок этиб, совринлар учун курашадилар. Улардан Туркистон вилоятидан 29 нафар спортчи Қозоғистон терма жамоаси сафида спортнинг 13 тури бўйича иштирок этади.
