Туркистон вилоятининг Тўлеби туманида йирик сут фермаси ишга тушади
TÚRKİSTAN. Кazinform – Тўлеби туманидаги Зертас қишлоқ округида «AZIA MILK» бренди остидаги йирик сут фермаси ишга туширилиши кутилмоқда. 2024-2027 йилларда амалга ошириладиган инвестиция лойиҳасининг умумий қиймати 1,3 млрд тенгени ташкил этади.
Қишлоқ чеккасида 10 гектар майдонда Исроил технологияси асосидаги фермер хўжалиги очиш ниятида бўлган тадбиркор 1200 бош қорамолга мўлжалланган молхона, ем-хашак йиғиш жойи, сут йиғиш ва сут маҳсулотлари тайёрлаш учун махсус бино қуради. Лойиҳа тўлиқ амалга оширилса, юзлаб маҳаллий аҳоли иш билан таъминланиши кутилмоқда.
Тўлеби тумани иқтисодиёти ривожига катта ижобий таъсир кўрсатаётган фермер хўжалигига туман ҳокими Толеген Телғараев махсус ташриф буюриб, лойиҳа билан яқиндан танишди. Тадбиркор фермер хўжалигига вентилятор ва замонавий ёритиш тизими, сигирларнинг ҳолатини аниқлаш учун видеокамералар ўрнатилишини маълум қилди. Туман раҳбари вилоятда сут чорвачилигини ишлаб чиқариш маскани сифатида ривожлантириб, туман аҳолисини иш билан таъминлашини таъкидлади. Бундан ташқари, хусусий тадбиркорнинг 240 бош қорамол боқиш шохобчаси фаолияти билан танишиб, давлат дастурларидан самарали фойдаланиш юзасидан маслаҳатлар берди.
Сўнгра туман ҳокими Киелитас қишлоқ округидаги хусусий тадбиркор Сакен Сарсеновнинг балиқчилик фаолияти билан танишди. Тадбиркор ўз маблағи ҳисобидан 0,5 гектар майдонда 10 тоннадан ортиқ сазан балиқлари етиштирмоқда. Шунингдек, 1,6 гектар майдонда дам олиш маскани қурган.
Муаллиф: Қайрат Зайнишев
