Туркистон вилояти фермерларига 50 га яқин трактор ва комбайн калитлари топширилди
TÜRKISTAN. Kazinform - Давлат раҳбари Қасим-Жомарт Тоқаев қишлоқ хўжалиги техникасини модернизация қилишни қўллаб-қувватлаш бўйича топшириқ берди. Туркистон вилоятида ҳам бу борадаги ишлар изчил давом эттирилмоқда.
Туркистон вилояти ҳокими Дархан Сатибалди Ордабаси туманига хизмат сафари доирасида Ақбулақ қишлоғида жойлашган «KAZ KIOTI» заводида бўлиб, фермерлар билан учрашди.
Бугунги кунда “Қишлоқ омонати” лойиҳаси доирасида вилоятда «Trade in» дастури қўлланилиб, фермерларга қишлоқ хўжалиги техникалари таклиф этилмоқда. Вилоят ҳокими фермерларга трактор ва комбайн калитларини топширди. Бугун жами 48 нафар фермер янги техника олди.
“Туркистон вилоятида “Қишлоқ омонати” лойиҳаси орқали қишлоқ хўжалиги соҳасига реал кўмак берилмоқда. «Trade in» дастури ҳам самарали амалга оширилмоқда. Ушбу кўмаклар билан қишлоқ хўжалиги техникаси янгиланмоқда. Бугун вилоятимиз фермерлари билан қувончли дамларда учрашяпмиз. Янги техникаларингиз билан табриклаймиз. Вилоят иқтисодиётини ривожлантиришга ҳисса қўшадиган лойиҳаларни ҳар доим қўллаб-қувватлашга тайёрмиз”, — деди Дархан Сатибалди.
Техникага эга бўлган деҳқонлар давлат томонидан кўрсатилаётган кўмак учун ўз миннатдорчилигини билдириб, раҳбарларга миннатдорчилик билдирди.
Туркистон вилоятида «Trade in» дастури амалга оширилмоқда. Айни пайтда «KAZ KIOTI» компанияси ишга киришди. Дастур орқали фермерларнинг ишдан чиққан эски техникалари баҳоланиб, бозор нархида қабул қилинмоқда. Бу фермерлар учун янги трактор олишда катта имкониятдир. Эски трактор ва техниканинг баҳоланган қиймати дастлабки тўлов сифатида олиниб, заводдан янги тракторлар «Оңтүстік» МЧЖ ва «Ырыс» микромолия ташкилоти орқали паст фоиз ставкасида ижарага берилмоқда.
Жанубий Кореянинг «Daedong» компанияси билан ҳамкорликда қишлоқ хўжалиги тракторлари ишлаб чиқарувчи корхона 2015 йилда иш бошлаган. Лойиҳа хусусий инвестор ҳисобидан амалга оширилмоқда. 5 гектар майдонда жойлашган заводнинг инвестицион қиймати - 6919,0 миллион тенге. Бу ерда 50 киши доимий иш билан таъминланган. Завод тўлиқ қувватга киргач, йилига 2000 та техника йиғиш имкониятига эга бўлади.
Ўтган йили 304 трактор ва 6 ғалла ўриш комбайнлари ишлаб чиқарилган бўлса, жорий йилнинг 3 ойида 180 трактор йиғилди. Завод раҳбарияти лойиҳанинг муваффақиятли амалга оширилишига ишонч билдирмоқда. Ишлаб чиқаришни янада ривожлантириш, жумладан, ишлаб чиқариш қувватини ошириш, ишлаб чиқарилаётган маҳсулот турларини кўпайтириш, маҳаллийлаштириш фоизини ошириш режалаштирилган.
Вилоятда қишлоқ хўжалиги техникасини янгилаш давом эттирилади.
