Турк биродарларга озиқ-овқат бўйича ёрдам беришга тайёрмиз – ҚР Қишлоқ хўжалиги вазири

ASTANA. Кazinform – Қозоғистон Туркиядаги вазият туфайли озиқ-овқат билан инсонпарварлик ёрдамини кўрсатишга тайёр. Бу ҳақда Қишлоқ хўжалиги вазири Ербол Қарашўкеев маълум қилди, дея хабар беради Кazinform мухбири.

«Биз учун қардош юртимизга ёрдам бериш муҳим. Агар керак бўлса, ёрдам бериш бизнинг бурчимиздир. Биз ёрдам беришга тайёрмиз. Бунинг учун Туркиядан махсус сўров бўлиши керак. Бизда халқаро гуманитар ёрдам фонди мавжуд. Биз тайёрмиз», — деди Ербол Қарашўкеев Ҳукумат уйида бўлиб ўтган брифингда ОАВ вакилларининг саволларига жавоб берар экан.

Эслатиб ўтамиз, Туркиянинг жануби-шарқидаги Газиантеп вилоятида 6,4-6,6, кейин эса 7,4 магнитудали кучли зилзила содир бўлди.

Кеча Давлат раҳбари Қасим-Жомарт Тоқаев Ҳукуматга Туркияга фавқулодда ёрдам кўрсатиш бўйича топшириқ берган эди. Шунингдек, Президент Туркия жануби-шарқида кўплаб қурбонлар бўлган зилзила муносабати билан Режеп Таййип Эрдоғанга ҳамдардлик телеграммаси йўллади.

Эслатиб ўтамиз, Қозоғистон Фавқулодда вазиятлар вазирлиги қутқарувчилари зилзила оқибатларини бартараф этиш учун Алматидан Туркияга жўнаб кетган эди. Унинг таркибига Қозоғистон Республикаси авария-қутқарув отрядининг қутқарувчилари, тиббиёт ходимлари ва хизмат итлари киради.

Бугун Туркияга учган Қозоғистон қутқарув борти Газиантепга қўниши маълум бўлди.

Охирги маълумотларга кўра, Туркиянинг Қаҳраманмараш вилоятида содир бўлган зилзила оқибатида ҳалок бўлганлар сони 3381 кишига етган, 20426 киши жароҳат олган.

Муаллиф: Даулет Изтилеу