Трамп ва Зеленский нима ҳақида гаплашди

ASTANA. Kazinform – Чоршанба куни Украина ва АҚШ президентлари телефон орқали мулоқот қилди, деб хабар беради BBC.

Украина ва Америка раҳбарлари музокаралар ҳақида ижтимоий тармоқларда хабар беришди. Трамп Truth Socialда Зеленский билан бир соат “жуда яхши” суҳбатлашганини айтди.

“Муҳокамаларнинг аксарияти кечаги президент Путин билан Россия ва Украинанинг талаб ва эҳтиёжларини келишиш бўйича суҳбатга асосланган. Биз тўғри йўлдамиз”, – деб ёзган АҚШ президенти.

Зеленский Х ижтимоий тармоғида Трамп билан суҳбат “ижобий, жуда маълумотли ва очиқ” бўлганини айтди.

“Президент Трампнинг Путин билан суҳбати кенг қамровли бўлиб, муҳокама қилинган асосий масалаларни тақдим этди. Урушни тўлиқ тугатиш йўлидаги биринчи қадамлардан бири энергия ва бошқа фуқаролик инфратузилмаларига ҳужумларни тўхтатиш бўлиши мумкин. Мен бу қадамни қўллаб-қувватладим ва уни амалга оширишга тайёр эканлигимизни тасдиқладим”, – деди Зеленский.

Бунгача Россия ва АҚШ президентлари телефон орқали гаплашган. Президентлар Украина минтақасидаги ҳозирги вазият юзасидан фикр алмашдилар.

Зеленский қисман сулҳни қандай кўришини тасвирлаб берди.

Украина ва Америка Қўшма Штатлари президентлари ўртасида бўлиб ўтган телефон мулоқотидан сўнг қилинган баёнотларда бу ҳафта Саудия Арабистонида бўлиб ўтадиган музокаралар тилга олинди. Кечқурун Zoom орқали журналистлар билан суҳбатлашган Владимир Зеленский бу воқеа қандай юз бериши мумкинлигини тушунтирди.

Унга кўра, Киев зарбага учрамайдиган нишонлар рўйхатини тузади. Бу рўйхатга нафақат энергетика инфратузилмаси объектлари, балки портлар ва темир йўл линиялари ҳам кириши мумкин, дея унинг сўзларидан иқтибос келтирмоқда Reuters агентлиги.

“Аммо менимча, уруш [Россия билан] келишувга эришмагунимизча ёки ҳатто қисман ўт очишни тўхтатиш бўйича тегишли ҳужжат бўлмагунча давом этади”, – деди у.

Аввалроқ Владимир Зеленский Россия томонидан асирда бўлган 175 нафар украиналик қайтарилганини маълум қилганди.