Трамп ўзаро тарифлар тўғрисидаги фармонни имзолади
ASTANA. Kazinform - Дональд Трамп АҚШ маҳсулотларига божлар жорий этадиган барча давлатларга нисбатан ўзаро тарифларни жорий этишга оид фармонни имзолади, деб хабар беради Kazinform агентлиги Euronewsга таяниб.
Бу ҳақда 13 февраль куни Оқ уй расман маълум қилди. Ҳужжатда АҚШдан импорт қилинадиган маҳсулотлар учун учинчи давлатларнинг жорий этаётган тарифлари таҳлил қилинган.
Ҳисоботга кўра, 2019 йилда 132 мамлакат ва 600 000 дан ортиқ маҳсулот бўйича АҚШ экспортчилари юқори тарифларга дуч келган. Бу ҳолат АҚШнинг ташқи савдо тақчиллигига олиб келаётган омиллардан бири сифатида баҳоланмоқда. Вашингтоннинг фикрига кўра, ташқи бозорлардаги бу мувозанатсизлик Америка бизнесининг рақобатбардошлигини пасайтиради.
Шу муносабат билан АҚШ ҳукумати адолатли савдо шароитларини таъминлаш мақсадида ўзаро тарифлар тизимини ишга туширишни режалаштирмоқда. Бу тизимга кўра, агар бирор давлат Америка маҳсулотларига юқори тарифлар белгиласа, АҚШ ҳам худди шундай жавоб чораларини кўради.
2024 йилда АҚШнинг товарлар савдоси тақчиллиги 1 триллион доллардан ошгани маълум қилинди. Бу эса савдо сиёсатини қайта кўриб чиқиш заруриятини янада кучайтирмоқда. Экспертларнинг фикрига кўра, ўзаро тарифлар тизими халқаро савдода янги музокараларга ва эҳтимолий келишмовчиликларга олиб келиши мумкин.
Эслатиб ўтамиз, аввалроқ АҚШ барча пўлат ва алюминий импортига божлар жорий этиши ҳақида хабар берган эдик.
