Трамп ХАМАСдан Ғазодаги барча исроиллик маҳбусларни озод қилишни талаб қилди

ASTANA. Kazinform – АҚШ президенти Дональд Трамп Ғазо секторида ХАМАС томонидан асирга олинган барча исроилликларни зудлик билан озод қилишни талаб қилди ва гуруҳ раҳбариятини анклавни тарк этишга чақирди, деб хабар беради BBC.

“Барча маҳбусларни кейинроқ эмас, ҳозир қўйиб юборинг ва ўлдирган одамларнинг жасадларини зудлик билан қайтаринг, акс ҳолда ёмон бўлади [...] Менинг айтганимни қилмагунингизча ХАМАСнинг бирорта ҳам аъзоси хавфсиз бўлмайди”, – деб ёзди у Truth Social ижтимоий тармоғида.

“Бу сиз учун охирги огоҳлантириш! Раҳбариятга (ХАМАС) келсак, ҳозир имкон қадар Ғазони тарк этиш вақти келди. Мен Ғазо халқига ҳам мурожаат қиламан: агар сиз одамларни гаровда ушламасангиз, сизни ажоиб келажак кутмоқда”, – дея қўшимча қилди у.

Оқ уй аввалроқ АҚШ ХАМАС билан гаровга олинганлар юзасидан музокаралар олиб бораётганини тасдиқлаган эди, гарчи Вашингтон ҳозирча улар билан бевосита алоқага чиқмаган. Оқ уй матбуот котиби Каролин Левитнинг айтишича, музокаралар бошланишидан олдин Исроил билан маслаҳатлашган.

Эслатиб ўтамиз, ХАМАС вакили Ҳазем Касем Ғазода қолган маҳбуслар фақат ўт очишни тўхтатиш келишувининг иккинчи босқичидаги музокаралар доирасида озод этилишини маълум қилган эди.