Трамп болаларни эмлаш бўйича тавсияларни ўзгартириш тўғрисидаги фармонни имзолади
ASTANA. Kazinform — АҚШ президенти Дональд Трамп қизамиқ, паротит ва қизилчага қарши MMR вакцинаси хавфли бўлиши мумкинлигини маълум қилди ҳамда аутизм хавфини камайтириш мақсадида ушбу учта вакцинани алоҳида-алоҳида қилишни талаб қилди, деб хабар беради New York Post.
Трамп ушбу фармонни Соғлиқни сақлаш вазири Роберт Кеннеди кичик билан биргаликда имзолади. Унинг таъкидлашича, маъмурият болаларни эмлаш бўйича тавсияларнинг «олтин стандарти»ни 17 та эмас, балки фақат 11 та асосий касалликка нисбатан кўриб чиқади.
Президент кичик ёшдаги болалар учун вакцинацияларнинг хавфсизлигига шубҳа билдирди.
“Биз MMR вакцинаси турли вақтларда эмланадиган учта алоҳида вакцинадан иборат бўлишини хоҳладик. Уларни бир вақтнинг ўзида қилиш жуда хавфли бўлиши мумкин, алоҳида қилинганда эса бундай хавф бўлмайди. Шунинг учун биз MMR вакцинацияларини турли вақтларда ўтказишга қарор қилдик”, — деди Дональд Трамп.
Трамп, шунингдек, ота-оналар фарзандларини қайси вакциналар билан эмланиши бўйича танлаш имкониятига эга бўлишини ҳам таъкидлади.
