Тошкентда Турк дунёси кинематографлари уюшмаси ташкил этилди
ТУРКСОЙ халқаро ташкилоти ташаббуси билан Тошкентда Турк дунёси кинематографлари иттифоқи (ассоциацияси) ташкил этилди, деб хабар беради Каzinform агентлиги.
Таъсис йиғилишида туркий тилли давлатлар кино саноати етакчилари иштирок этди.
ТУРКСОЙ матбуот хизмати хабарига кўра, тадбирда Озарбайжон кино агентлиги раҳбари Орхан Фикретогли, “Қазақфильм” уюшмаси президенти Азамат Сатибалди, Ўзбекистон Кинематография агентлиги раҳбари Фирдос Абдухолиқов, Туркия Кинематография Бошқармаси бош директори Еркин Йилмазот, Қирғизистон кинематография Департаменти директори Ақжол Бекболотов, шунингдек, ТУРКСОЙ кинематография бўйича вакили Салим Эзер иштирок этди.
Уюшма туркий дунё кино санъатини жонлантириш, қўшма кинолойиҳаларни яратиш, биргаликда янги фильмлар суратга олиш, шунингдек, энг яхши фильмларни халқаро майдонга олиб чиқиш, туркий тиллар фильмлари учун ягона кинопрокат тизимини яратиш мақсадида ташкил этилган.
Келгусида туркий халқларнинг қўшма кинолойиҳалари учун майдонга айланадиган Турк дунёси киноакадемияси ташкил этилиши режалаштирилган.
