Тошкентда Coca-Cola, Pepsi, Evos, Safia компаниялари жаримага тортилди

TASHKENT. Kazinform - Тошкентда ташқи реклама ва ахборотни жойлаштириш тартибини бузган компаниялар жаримага тортилди, деб хабар беради Kazinform агентлиги Ўзбекистон Рақобат қўмитасига таяниб.

Қайд этилишича, Қўмитанинг Тошкент шахар ҳудудий бошқармаси томонидан 2025 йилнинг январь ва февраль ойлари давомида реклама тўғрисидаги қонунчилик талабларига мувофиқлиги юзасидан ўрганиш ва мониторинг ишлари олиб борилган.

Олиб борилган ўрганиш натижаларига мувофиқ, ҳудудий бошқарма Махсус комиссияси томонидан Тошкент шаҳрида фаолият кўрсатаётган 30 дан ортиқ хўжалик юритувчи субъектларга, хусусан, «COCA-COLA ICHIMLIGI UZBEKISTON LTD» MCHJ XK, «INTERNATIONAL BEVERAGES TASHKENT» MCHJ XK (PEPSI), «MAK FOOD SERVIS» MCHJ (EVOS), «LUMIERI» MCHJ, «TURAN MEDIA» MCHJ, «OQTEPA FOOD SERVICE» MCHJ (Oqtepa Lavash), «BARATRUM» MCHJга (Safia) нисбатан ишлар қўзғатилиб, молиявий жарималар қўллаш ҳақида қарорлар қабул қилинди.

Улар «Реклама тўғрисида»ги қонун ҳамда Вазирлар Маҳкамасининг «Ташқи реклама бозорини тартибга солиш тўғрисида»ги 104-сонли қарори билан тасдиқланган низомда белгиланган ташқи реклама ва ахборотни жойлаштириш тартибини бузган.

Шунингдек, қонунбузилиш ҳолатини бартараф этиш ва келгусида йўл қўймаслик бўйича бажарилиши мажбурий бўлган кўрсатмалар берилди.

Эслатиб ўтамиз, Ўзбекистон биржасида фермерлар учун дизель нархининг ўсиши чеклангани ҳақида хабар берган эдик.