Тошкент МДҲ давлатларининг Ёшлар пойтахтига айланди
TASHKENT. Kazinform - Тошкентда шаҳарга “МДҲ Ёшлар пойтахти” мақомини беришга бағишланган тантанали маросим бўлиб ўтди, деб хабар беради Kazinform агентлиги мухбири.
Тантанали маросимда Ўзбекистон, Россия, Озарбайжон, Арманистон, Беларусь, Қозоғистон, Қирғизистон ва Тожикистон делегациялари раҳбарлари иштирок этди.
Тошкент МДҲнинг биринчи ёшлар пойтахти бўлиши тўғрисидаги қарор 2023 йил 8 июнда Сочи шаҳрида бўлиб ўтган Мустақил Давлатлар Ҳамдўстлиги Ҳукумат раҳбарлари кенгашининг “МДҲ Ёшлар пойтахти” халқаро лойиҳасини амалга оширишга бағишланган йиғилишида қабул қилинган.
МДҲ Бош котиби Сергей Лебедев тадбир ташкилотчилари ва иштирокчиларига табрик йўллади. Ҳамдўстлик фазосида маданий-гуманитар соҳадаги давлатлараро ҳамкорлик йилдан-йилга такомиллашиб, янги лойиҳа ва дастурлар пайдо бўлаётганини таъкидлади.
“Ҳамдўстлик давлатларининг ёшлар билан ишлаш борасидаги саъй-ҳаракатларини бирлаштириш, ёшлар салоҳиятини ривожлантириш борасида тажриба алмашиш ва халқаро ёшлар ҳамкорлигини такомиллаштиришга қаратилган ана шундай лойиҳалардан бири “МДҲ ёшлар пойтахти” лойиҳасидир, — деди Сергей Лебедев.
МДҲга аъзо давлатлар Ёшлар масалалари бўйича кенгаши котибияти раҳбари ўринбосари Татьяна Ковалева пойтахт ҳокимлигига Тошкент шаҳрига янги мақом берилганлиги тўғрисидаги гувоҳномани топширди.
2025 йилда Озарбайжоннинг Габала шаҳри Ҳамдўстликнинг янги ёшлар пойтахтига айланади, 2026 йилда эса бу мақом Арманистоннинг Капан шаҳрига ўтади.
