Тоқаев Балқаш АЭСи қурилишини келгуси йили бошлашни таклиф қилди
ASTANA. Kazinform — Давлат раҳбари Қасим-Жомарт Тоқаев келгуси йили «Балқаш» атом электр станцияси қурилишини бошлашни, шунингдек, «Мойинқум» АЭСи қурилишини жадаллаштириш мақсадида комплекс ҳамкорлик тўғрисидаги битимни имзолашни таклиф қилди.
Президент атом энергетикасини ривожлантириш алоҳида аҳамиятга эга эканини эслатди.
“Умумхалқ референдуми натижаларига кўра, атом электр станциясини, ҳатто бирданига бир нечта станция қуриш ҳақида тўғри қарор қабул қилинди. Энди атом электр станцияларини келгуси эллик йил давомида ва ундан кейин ҳам уран хомашёси билан қандай таъминлашимиз ҳақида ўйлашимиз керак”, — деди Қасим-Жомарт Тоқаев Қозоғистон халқига Мурожаатномасида.
Президент Қозоғистондаги АЭСларнинг эҳтиёжларини келгуси юз йил давомида қондириш имконини берадиган Давлат стратегик уран захирасини ташкил этиш таклифини жиддий кўриб чиқиш лозимлигини таъкидлади.
“АЭС қурилишида иштирок этаётган хорижий ҳамкорларни Қозоғистонда юқори технологияли ишлаб чиқариш корхоналарини очишга, ядровий энергетика соҳасидаги билим ва тажрибани етказишга, шунингдек, мамлакатимиз атом саноати учун мутахассислар тайёрлашга жалб этиш муҳим. Шундай таклифларни Россия ва Хитой компаниялари ҳам билдирмоқда. Келгуси йилнинг ўзида «Балқаш» АЭСи қурилишини бошлашни, шунингдек, «Мойинқум» АЭСи қурилишини имкон қадар тезроқ бошлаш учун комплекс ҳамкорлик тўғрисидаги битимни имзолашни мақсадга мувофиқ, ҳатто зарур деб ҳисоблайман”, — деди Давлат раҳбари.
Шу билан бирга, музокаралардаги барча позициялар Қозоғистоннинг миллий манфаатларини ҳисобга олган ҳолда пухта ишлаб чиқилиши ва келишиб олиниши кераклиги таъкидланди.
