Тоқаев «Атлетико Мадрид» бош директорини II даражали «Достық» ордени билан тақдирлади
ASTANA. Kazinform — Президент Қасим-Жомарт Тоқаев «Атлетико Мадрид» клуби бош директори Мигель Анхель Хиль Маринни II даражали «Достық» ордени билан тақдирлади.
Ақорда матбуот хизматининг хабар беришича, Қасим-Жомарт Тоқаев ушбу орденни Мигель Анхель Хиль Маринга Қозоғистонда футболни ривожлантиришга қўшган ҳиссаси учун топширди.
Эслатиб ўтамиз, аввалроқ Давлат раҳбари «Атлетико Мадрид» клуби бош директори Мигель Анхель Хиль Маринни қабул қилгани ҳақида хабар берган эдик.
Президент Қасим-Жомарт Тоқаев «Атлетико Мадрид» футбол клуби билан муваффақиятли ҳамкорликни юқори баҳолаб, Мигель Анхель Хиль Мариннинг Қозоғистонга ташрифи шериклик муносабатларини янги босқичга олиб чиқиш имконини беришини таъкидлади.
Давлат раҳбарининг айтишича, Қозоғистон замонавий футбол инфратузилмаси, машғулот базалари ва ёш футболчиларни тайёрлаш дастурларига фаол сармоя киритмоқда. Шу билан бирга, мамлакатда футбол клубларини хусусийлаштириш жараёни ҳам давом этмоқда.
Бундан ташқари, Президент FIFA билан ҳамкорликда мамлакатнинг барча ҳудудларида болалар учун 100 дан ортиқ янги футбол майдончасини қуриш ишлари бошланганига эътибор қаратди.
