Тоқаев: 2024 йил айниқса муҳим йил, чунки бу давр келгуси беш йил ичида мамлакат ривожланиши учун асос бўлади
Қасим-Жомарт Тоқаев 2024 йил айниқса муҳим йил бўлишини таъкидлади, деб хабар беради Kazinform.
“2023 йил мамлакатимиз учун муҳим воқеаларга бой бўлди. Биз асосий сиёсий ислоҳотларни якунладик. Конституциявий суд ўз фаолиятини бошлади. Янги регламентга кўра барча даражадаги мажлис ва масъулат депутатлари сайланди. Биринчи марта туман ва вилоят ҳокимларини сайладик. Қишлоқлар ва туман аҳамиятидаги шаҳарлар ҳокимлари сайлови давом этди. Ўтган йили 700 га яқин қишлоқ ҳокими сайланган. Биз адолатли ва рақобатбардош иқтисодий тизим яратишга киришдик. Биз иқтисодиётни диверсификация қилиш ва монополиядан халос бўлиш, инфратузилмани модернизация қилиш, бизнесни қўллаб-қувватлаш, сармояларни жалб қилиш билан банд бўлдик”, – деди Давлат раҳбари “Егемен Қазақстан” газетасига берган интервьюсида.
Унинг сўзларига кўра, ижтимоий соҳада тўпланиб қолган муаммолар босқичма-босқич ҳал этилмоқда.
Мамлакатнинг барча ҳудудларида таълим марказлари, жумладан, “қулай мактаблар” кўпаймоқда.
Қишлоқларда соғлиқни сақлаш муассасалари барпо этилмоқда. Ижтимоий ҳимояга муҳтож қатлам фуқароларини ҳар томонлама қўллаб-қувватлаш мақсадида Ижтимоий Кодекс қабул қилинди.
Зарарли меҳнат шароитида ишлайдиган фуқаролар учун махсус тўлов жорий этилди.
Табиатни муҳофаза қилиш учун масъул бўлган муассасалар ходимларига уларнинг ҳаёти ва соғлиғига хавф туғдирганлиги сабабли қўшимча ҳақ тўланадиган бўлди.
Тиббиёт ходимлари, мактаб, коллеж ва боғчаларда ишлаётган ўқитувчиларнинг маошлари оширилди.
Миллий жамғармадан болаларга маблағ ажратишни тартибга солувчи қонун кучга кирди.
Асосий иқтисодий кўрсаткичларни, жумладан, инфляция даражасини ҳисобга олган ҳолда энг кам иш ҳақини белгиловчи методология қабул қилинди.
“Бу ишларнинг барчаси 2024 йилда давом этади. Биз эҳтиёткорлик билан ва режалаштирилган ҳаракатларни амалга оширамиз, мақсадга эришиш учун доимо интиламиз. Бу, айниқса, муҳим йил бўлади. Зеро, бу давр келгуси беш йилда мамлакатимиз тараққиётига асос бўлади”, – дейди Президент.
Янги йилда мамлакат олдида қандай вазифалар турибди, деган саволга Қасим-Жомарт Тоқаев янги иқтисодий моделга ўтиш кераклигини айтди.
“2029 йилгача ялпи ички маҳсулотни икки баробарга ошириш масаласини асосий стратегик мақсад қилиб қўйдим. Тез орада ҳукуматнинг кенгайтирилган йиғилиши бўлиб ўтади. Унда мамлакатимизнинг ўтган йилги ижтимоий-иқтисодий ривожланиши сарҳисоби эълон қилинади, келгусидаги ишлар услублари белгилаб олинади. Миллий Қурултой мажлислари мафкура, миллатнинг янги сифатини шакллантириш, жамият қадриятлари тизимини модернизация қилиш каби масалалар муҳокама қилинадиган самарали муҳокама майдонига айланди. Бундан олдин ёзда чақириладиган Қурилтой сессиясини, эҳтимол, бу йил бироз олдинроқ, баҳорда ўтказамиз. Шундай қилиб, жорий йилда иқтисодий, ижтимоий-сиёсий ва гуманитар соҳаларда амалга ошириладиган ишларнинг асосий йўналишлари биринчи чоракда белгиланади”, – деди Давлат раҳбари.
