Таиландда ўқувчи мактабда ўқ узди: етти киши ҳалок бўлди
ASTANA. Kazinform – Бангкок шаҳрининг шимолида жойлашган Нонтхабури вилоятидаги мактабда содир бўлган отишма оқибатида етти киши ҳалок бўлди, яна 15 киши жароҳат олди, деб хабар беради Reuters.
Ҳалок бўлганлар орасида уч нафар ўқитувчи, уч нафар ўқувчи ва ўз жонига қасд қилган ҳужумчи ҳам бор. Жароҳатланганлардан икки нафарининг аҳволи оғир.
Полиция маълумотига кўра, ҳужумчи 14 ёшли ўқувчи бўлган. У камида 26 марта ўқ узган, қўлга олинганидан кейин эса ундан яна 34 та ўқ-дори топилган. Дастлабки маълумотларга кўра, тўппонча унинг бобосига тегишли бўлган.
Полициянинг тахминига кўра, ҳужумчи мактаб ҳудудида ўқ узишдан аввал уйида буви ва бобосини ҳам отиб ўлдирган.
Reuters маълумотига кўра, бу Таиландда 2022 йилдан буён содир бўлган энг йирик оммавий қотиллик ҳисобланади.
Шунингдек, бу жорий йилда мактабда содир бўлган иккинчи отишма бўлди. Февраль ойида мамлакат жанубидаги мактабда содир бўлган ҳодисада бир ўқитувчи ҳалок бўлган, бир ўқувчи эса жароҳат олган.
Июнь ойида эса Филиппиннинг марказий қисмидаги мактабда юз берган отишма натижасида уч нафар ўқувчи ҳалок бўлиб, камида 20 киши жароҳатланган эди.
