Сув тошқинидан жабрланганларга маиший техника учун ҳам пул берамиз – ҚР Ҳукумати раҳбари

ASTANA. Kazinform – ҚР Бош вазири Олжас Бектенов Ҳукумат йиғилишида тошқиндан жабр кўрган аҳолига маиший техника сотиб олиш учун маблағ ажратилишини айтди.

“Жабрланганларга товон тўлаш тартибига ўзгартиришлар тасдиқланди. Кеча тегишли фармонни имзоладим. Айни пайтда 11 мингга яқин оилага 100 ойлик ҳисоб-китоб кўрсаткичи миқдорида тўловлар берилди. Бу бошланиши, холос. Бундан ташқари, биз 150 тагача ойлик ҳисоб-китоб кўрсаткичларини тўлаймиз. У орқали одамлар йўқолган музлатгич, стол, стул, идиш-товоқ, кийим-кечак каби биринчи зарур буюмларни харид қилишлари мумкин”, – деди Ҳукумат раҳбари.

Шунингдек, тадбиркорларнинг зарари қопланишини айтди.

“Фуқароларга айтмоқчиманки, тинчланинг ва сабрли бўлинг. Ҳеч ким ёрдамсиз қолмайди. Бу масалаларнинг барчаси менинг ва Президентимизнинг шахсий назоратида. Шунинг учун биз бу синовдан шараф билан ўтишимизга ишонаман”, – деди Бош вазир.