Сурияда вертолёт ҳалокатга учради, 22 нафар америкалик ҳарбий жароҳат олди
Бахтсиз ҳодиса якшанба куни содир бўлган, аммо душанба куни кечқурун АҚШ ҳарбийлари воқеа ҳақида хабар берган. Жароҳатнинг сабаби ва жиддийлигига аниқлик киритилмаган.
«Турли даражадаги жароҳат олган 22 кишидан 10 нафари CENTCOM масъулият ҳудудидан ташқаридаги юқори даражадаги тиббий муассасаларга эвакуация қилинди», – дейилади хабарда.
CENTCOMнинг маълум қилишича, душман томонидан отишма қайд этилмаган ва ҳодиса сабаблари ўрганиляпти.
Сурияда «Исломий давлат»га қарши курашаётган халқаро коалицияга АҚШ етакчилик қилади. Араб Республикасидаги Америка қуролли контингенти сони қарийб 900 кишини ташкил этади.
CENTCOM АҚШ Мудофаа вазирлигининг ўн битта қўшма жанговар қўмондонликларидан бири. У АҚШнинг Яқин Шарқ, Шарқий Африка ва Марказий Осиёдаги ҳарбий амалиётларини режалаштириш ва бошқариш учун жавобгар. Бош қароргоҳ Флорида штатининг Тампа шаҳридаги ҳаво кучлари базасида жойлашган.
