Сурия бозоридаги портлашда 7 киши ҳалок бўлди

Сурия бозоридаги портлашда 7 киши ҳалок бўлди
Фото: bbc.com

ASTANА. Кazinform — Сурия шимолидаги Аазаз шаҳри марказий бозорида миналаштирилган автомобилнинг портлаши оқибатида камида 7 киши ҳалок бўлди ва бир неча киши жароҳатланди. Бу ҳақда BBC хабар беради.

Ижтимоий тармоқларда ерда ётган жасадлар, шикастланган бинолар ва ёнаётган машиналар акс этган видеолар тарқалди.

Туркия чегарасидан етти километр узоқликдаги кичик шаҳарчадаги портлаш ортида кимлар тургани ҳозирча номаълум.

“Оқ дубулғалар” кўнгиллилар ташкилоти қутқарувчилари ҳалок бўлганлар орасида 2 нафар бола борлигини маълум қилди.

Аазаз шаҳри Сурия президенти Башар ал-Ассадга қарши курашаётган туркпараст кучлар назорати остида.

Туркия қўшинлари ва улар қўллаб-қувватлайдиган кучлар Суриянинг Туркия чегарасига яқин ҳудудларини назорат қилмоқда.

Бундай портлашлар Сурия шимоли-ғарбидаги чегара ҳудудларида, жумладан, аҳоли зич жойлашган Аазазда тез-тез содир бўлади.

2016 йилнинг ноябрида исёнчиларнинг Аазаздаги қароргоҳи яқинида бомба ўрнатилган автомобиль портлаши оқибатида 25 киши ҳалок бўлган эди. Октябрь ойида исёнчилар назорат пунктига уюштирган худди шундай ҳужумда 17 киши ҳалок бўлди.

2017 йилда Аазаз шаҳридаги шаҳар суд биноси ёнида бомба ўрнатилган автомобиль портлаб, 40 дан ортиқ одам ҳалок бўлган эди.

Ушбу ҳужумни "Исломий давлат" гуруҳи (Қозоғистонда тақиқланган) ўз зиммасига олди, улар 2013 йилда шаҳарни эгаллаб, бир муддат назоратда ушлаб турди.

Сўнгги хабарлар