Словения ҳукумати Фаластинни мустақил давлат сифатида тан олиши мумкин
LÜBLÄNA. Кazinform - Словения ҳукумати Фаластинни мустақил давлат сифатида тан олишга қарор қилди. Бу ҳақда мамлакат ташқи ишлар вазирлиги Х (собиқ Twitter) тармоғидаги расмий саҳифасида маълум қилди, деб ёзади TASS.

- Бугун Словения ҳукумати Фаластин мустақиллиги ва суверенитетини тан олишга қарор қилди ва уни Миллий Ассамблеяга тақдим этди, - дейилади хабарда.
Қарор парламент қуйи палатаси томонидан 4 июнь куни кўриб чиқилиши кутилмоқда.
Душанба куни Словения Бош вазири Роберт Голоб Фаластинни тан олиш масаласини кўриб чиқиш қарорини эълон қилди. Унинг қайд этишича, бу давлат БМТ Хавфсизлик Кенгашининг масъул аъзоси сифатида Яқин Шарқда мустаҳкам тинчлик ўрнатиш учун барча имкониятларни ишга солишга мажбур.
22 май куни Ирландия, Испания ва Норвегия ҳукумати Фаластин давлатчилигини тан олиш қарорини эълон қилди. Бунга жавобан Исроил ташқи ишлар вазири Исраэль Кац Дублин, Мадрид ва Ослодаги элчиларни маслаҳатлашувлар учун чақирди.
Шу билан бирга, Ирландия, Испания ва Норвегия дипломатик ваколатхоналари раҳбарлари яҳудий давлати Ташқи ишлар вазирлигига таклиф қилинди ва у ерда демарш эълон қилинди.
Европа Иттифоқининг ташқи ишлар ва хавфсизлик сиёсати бўйича Олий вакили Жозеп Боррелнинг маълум қилишича, май ойи охиригача Европа Иттифоқининг бир қанча давлатлари Фаластинни тан олади.
Шу пайтгача унинг мустақиллигини Болгария, Венгрия, Кипр, Мальта, Польша, Руминия, Словакия, Чехия, Швеция тан олган.
Умуман олганда, БМТнинг 193 давлатидан 143 таси ушбу позицияга амал қилади.