Швеция миллий хавфсизликка таҳдид соладиган одамларни фуқароликдан маҳрум қилмоқчи

ASTANA. Kazinform – Швеция давлат хавфсизлигига таҳдид солувчи жиноят содир этган икки ёки ундан ортиқ фуқаролиги бўлган шахсларни фуқароликдан маҳрум қилмоқчи. Шу мақсадда улар ҳатто конституцияни ўзгартиришни ҳам режалаштирмоқда, деб хабар беради Еuronews.

Швеция
Фото: veneya.com.ua

“Бу жосуслик ёки давлатга хиёнат каби жиноятларда айбдор деб топилган, шунингдек, пора ёки фирибгарлик йўли билан фуқароликни қўлга киритган шахслар Швеция паспортларидан маҳрум этилиши мумкинлигини англатади”, – дея эълон қилди чоршанба куни мамлакат ҳукумати.

Ўзгартириш партиялараро қўмита томонидан таклиф қилинган. Келгуси йил парламентда овозга қўйилади ва 2026 йил июнь ойида кучга кириши мумкин.

Ҳозирда Швеция конституцияси фуқароликдан маҳрум этишга рухсат бермайди.

Миграция вазири Юхан Форсселл ўтган йили миллий хавфсизликка таҳдид солаётган 600 га яқин одам Швеция фуқаролигини олиш учун ариза топширганини эълон қилган эди.

Бир вақтлар Швеция Европа Иттифоқининг мигрантлар учун энг қулай давлатларидан бири ҳисобланган. Хорижда туғилиб, Швеция фуқаролигини олганлар сони сўнгги йигирма йил ичида икки баравар кўпайди. Бу мамлакатдаги 10,5 миллион аҳолининг бешдан бир қисми демакдир.

Ҳукумат шунингдек, икки фуқароликка эга бўлган жиноий гуруҳ аъзоларини давлат фуқаролигидан чиқаришни таклиф қилди, бироқ парламент қўмитаси бу таклифни рад этди.

Шу ҳафта бошида ҳукумат фуқароликка даъвогарлар энди мамлакатда беш йил эмас, саккиз йил яшаши кераклигини эълон қилди.

“Биз Швеция фуқаролиги муҳимроқ бўлган Швецияни яратмоқчимиз”, – деди Форселл.

Сўнгги хабарлар