Швецияни «оғир қиш» кутиб турибди - молия вазири
«Ҳаво қанчалик совуқ ва ғамгин бўлишини ҳозирча билмаймиз»
, — деди расмий.
Ҳукумат Швециянинг ялпи ички маҳсулоти (ЯИМ) келгуси йилда 0,4 фоизга қисқаришини кутмоқда, инфляция эса 5,9 фоизга етиши мумкин. Ишсизлик даражаси ҳам ошиши кутилмоқда.
«Швециянинг солиқ-бюджет сиёсати юқори инфляцияни пасайтириш зарурати нуқтаи назаридан ҳам, иқтисодий таназзулни бошқариш нуқтаи назаридан ҳам яхши мувозанатлашгани муҳим»
, - деди Элизабет Свантессон.
Ялпи ички маҳсулотнинг прогноз қилинаётган пасайишига изоҳ берар экан, у Швеция кичик давлат бўлганлиги сабабли унинг савдо ҳамкорлари иқтисодига таъсир қилишини айтди. Мисол тариқасида Элизабет Свантессон «катта муаммолари бор» Германияни тилга олди.
«Юқори ишсизлик муаммодир ва биз ҳозир таназзулга юз тутаётганимиз сабабли, кўпроқ одамлар меҳнат бозоридан четда қолади»
, - деди вазир.
Ҳукуматнинг прогнозлари Иқтисодий тадқиқотлар миллий институтининг сентябр ойидаги ҳисоботида кўрсатилган прогнозларга тўлиқ мос келади.
Ушбу ҳисоботга кўра, Швеция марказий банки ўз фоиз ставкасини ҳозирги 1,75 фоиздан 2023 йилда 2,3 фоизга ошириши кутилмоқда.
Мамлакат истеъмолчилари ҳам келаётган йилга пессимистик қарашда. Сентябр ойида истеъмолчилар ишончи 49,7 га тушиб, рекорд даражада пасайди. Бу 2021 йилнинг ёзида қайд этилган 110 баллдан анча паст.
Чакана сотувчилар орасида ишонч индекси ҳам август ойида 91,3 пунктдан сентябрда 81,7 пунктга тушди.
Ҳукумат келаси ҳафта бюджет лойиҳасини тақдим этади.
