ШҲТга аъзо давлатлар Хавфсизлик кенгашлари котибларининг учрашуви бўлиб ўтади – ҚР ТИВ
ASTANA. Kazinform – Қозоғистон пойтахтида Шанхай ҳамкорлик ташкилотига аъзо давлатлар Хавфсизлик кенгашлари котибларининг учрашуви бўлиб ўтади. Бу ҳақда ҚР Ташқи ишлар вазирлиги расмий вакили Айбек Смадияров маълум қилди.
"2024 йилнинг 2-3 апрель кунлари Астана шаҳрида Шанхай ҳамкорлик ташкилотига аъзо давлатлар Хавфсизлик кенгашлари котибларининг 19-йиғилиши бўлиб ўтади. Бўлажак тадбир Қозоғистон раислигида ўтказилади ва Эрон илк бор ташкилотнинг тўлиқ аъзоси сифатида иштирок этади. Ташкилотнинг кузатувчи давлатлари – Мўғулистон ва Беларусь меҳмон сифатида таклиф этилди. Ушбу учрашув доирасида ташкилот масъулият соҳасининг долзарб халқаро муаммолари, жумладан “ёвузликнинг уч кучи” (терроризм, сепаратизм, экстремизм), гиёҳвандлик воситалари ва психотроп моддаларнинг ноқонуний айланиши, трансмиллий уюшган жиноятчилик ва халқаро ахборот хавфсизлигини таъминлаш йўналишидаги ҳамкорлик, шунингдек, Бирлашган Миллатлар Ташкилоти, Осиёда ҳамкорлик ва ишонч чоралари бўйича кенгаш, Коллектив ташкилот каби кўп томонлама ташкилотлар доирасидаги ҳамкорликни янада ривожлантириш юзасидан фикр алмашиш режалаштирилган”, – деди расмий вакил.
Унинг сўзларига кўра, тадбир якунида ташкилотга аъзо давлатлар Хавфсизлик кенгашлари котиблари йиғилиши баённомасини имзолаш режалаштирилган. Унда минтақавий ва халқаро хавфсизлик масалалари бўйича кўп томонлама ҳамкорликни янада ривожлантириш бўйича аъзо давлатларнинг умумий қарашлари акс эттирилган.
“Бўлажак учрашув умуман Қозоғистоннинг хавфсизлик ва барқарорлик соҳасида минтақавий ҳамкорликни таъминлашдаги узоқ муддатли манфаатларига мос келади ва Қозоғистоннинг ШҲТ доирасидаги кўп томонлама ҳамкорлиги даражасини оширишга, шунингдек, таҳдидларга қарши ҳаракат қилиш соҳасида минтақадаги асосий ҳамкорлар билан яқин сиёсий мулоқот қилишга қаратилган”, – деди Айбек Смадияров.
