Сеул метросида ўриндиқсиз вагонлар пайдо бўлади

Жанубий Кореяда шу ҳафтада “тиғиз” соатларда гавжумликни камайтириш мақсадида метрода ўриндиқсиз вагонли поездлар пайдо бўлади, дея хабар беради Kazinform Yonhapга таяниб.

Сеул метросининг таъкидлашича, чоршанба кунидан бошлаб эрталаб ва кечқурун "тиғиз" соатларда метрополитеннинг 4-линиясидаги поездларнинг ҳар бирида биттадан вагон ўриндиқсиз ҳаракатланади.

Шаҳар метроси операторининг айтишича, бахтсиз ҳодисаларнинг олдини олиш учун ўриндиқсиз вагонларга қўшимча таянч ва тутқичлар ўрнатилган.

Сеул метросининг маълумотларига кўра, ўтган йилнинг учинчи чорагида эрталаб ва кечқурун “тиғиз” соатларда, 4-линиясидаги метро вагонларида бандлик 193,4% ни ташкил этди, бу одатдагидан деярли икки баравар кўп.

Шунингдек, бошқа метро йўналишларида ҳам ўриндиқсиз вагонларни жорий этиш имконияти кўриб чиқилмоқда.