Сенаторлар Қозоғистон ташқи сиёсати масалаларини муҳокама қилдилар

NUR-SULTAN. Kazinform – Бугун Сенатда Қозоғистон Республикасининг хорижий давлатлар ва халқаро ташкилотлар билан муносабатларида ягона ташқи сиёсат ва иқтисодий йўналиш ҳамда инвестиция сиёсатини таъминлаш масалалари муҳокама қилинди, деб хабар беради Kazinform.

Сенат матбуот хизмати хабарига кўра, Сенат раиси ўринбосари Асқар Шакиров бошчилигидаги Сенатнинг Халқаро ишлар, мудофаа ва хавфсизлик масалалари қўмитаси аъзолари ташқи ишлар вазири ўринбосари Ақан Рахметуллин билан учрашди.

«Бугунги кунда жаҳондаги геосиёсий вазиятнинг кескин ўзгариши ва мисли кўрилмаган таҳдидлар муносабати билан Давлат раҳбари ТИВнинг кенгайтирилган йиғилишида, шунингдек, яқинда ўзининг дастурий маърузаларида илгари сурилган вазифалар ижросини таъминлаш муҳим аҳамиятга эга». — деди А.Шакиров.

Ташқи ишлар вазири ўринбосари Ақан Рахметуллин сенаторларга ташқи сиёсатнинг асосий йўналишлари ва мақсадлари, шунингдек, мамлакатимизнинг долзарб устувор йўналишлари ҳақида маълумот берди.

А.Рахметуллиннинг таъкидлашича, Қозоғистоннинг мустақиллик тонгида ўрнатилган сиёсий йўналишининг асосий тамойилларида ташқи сиёсатнинг давомийлиги сақланиб қолмоқда ва унинг самарадорлиги вақт синовидан ўтган мувозанат, прагматизм ва миллий манфаатларни ҳимоя қилишга асосланади.

Мустақилликни мустаҳкамлаш, халқаро ва минтақавий ҳамкорлик ва хавфсизликни таъминлашга қаратилган анъанавий ташқи сиёсатда ҳам ривожланишнинг иқтисодий векторига эътибор қаратилади. Бу мамлакат иқтисодиётига тўғридан-тўғри хорижий инвестициялар жалб этиш, шунингдек, тариф ва нотариф тўсиқларини камайтириш ҳисобига Қозоғистон экспорти учун ташқи бозорларни кенгайтириш чора-тадбирларини кучайтиради.

Йиғилишни якунлар экан, қўмита раиси Мухтар Қул-Мухаммед пандемиядан кейинги тикланиш муаммолари Қозоғистон олдига янги мақсад ва вазифалар қўйганини таъкидлади. Бу кўп томонлама ва икки томонлама дипломатияни ривожлантириш ва глобал иқтисодий инқироз оқибатларини бартараф этишга тааллуқлидир. Бунинг учун тез, самарали қарор қабул қилиш ва ресурслардан тўғри фойдаланиш муҳим аҳамиятга эга.

Учрашувда сенаторлар ташқи сиёсатнинг долзарб масалалари, жумладан, халқаро ташкилотларда қозоғистонлик кадрларни алмаштириш, халқаро шартномалар мониторинги билан боғлиқ масалаларни кўтардилар.