Саудия Арабистонига Ҳаж зиёратини адо этиш учун 1,5 миллионга яқин зиёратчи келди
Саудия Арабистони Ҳаж ва Умра вазирлиги маълумотларига кўра, бу йил хорижлик зиёратчилар учун Ҳаж нархи 39 фоизга арзонлаштирилган. Вазирлик бу йил Ҳаж зиёратига борувчи зиёратчилар сони пандемиядан олдинги даражага қайтишини кутмоқда.
Саудия Арабистони Қизил Ярим Ой Жамияти зиёратчиларга шошилинч ёрдам кўрсатиш учун 2300 дан ортиқ кўнгиллини юборади, деб хабар беради Аl Аrabiya.
Қизил Ярим Ой Жамияти маълумотларига кўра, 2200 дан ортиқ тиббиёт ходимлари фавқулодда вазиятлар юзага келганда зиёратчиларга ёрдам беришга тайёр. Шунингдек, 240 дан ортиқ ер ва ҳаво тез ёрдам машиналари ҳам тайёр ҳолатда бўлади.
Саудия ҳукумати томонидан коронавирус пандемияси сабабли карантин чекловлари киритилгунга қадар ҳар йили тахминан 2,6 миллион киши Ҳаж зиёратини адо этган.
Ҳаж исломнинг беш фарзидан биридир. Бу Макка зиёрати бўлиб, ҳар бир мусулмон ҳаётида камида бир марта шундай имкониятга эга бўлса, буни амалга ошириши керак.
Бу йил Ҳаж зиёрати 26 июнь куни бошланади.
