Саноат вазири Президентни вазирликнинг истиқболдаги режалари билан таништирди
ASTANA. Kazinform – Қасим-Жомарт Тоқаев ҚР Саноат ва қурилиш вазири Ерсайин Нағаспаевни қабул қилди, деб хабар беради Ақорда матбуот хизмати.
Давлат раҳбарига вазирликнинг ўтган йилги фаолияти якунлари ва келгуси давр режаси ҳақида маълумот берилди.
Ерсайин Нағаспаевнинг таъкидлашича, ўтган йили асосий капиталга инвестициялар ва қайта ишланган маҳсулотлар экспорти соҳада энг юқори ўсишни кўрсатди. Жорий йилда ҳам ушбу тенденцияни сақлаб қолиш ва ишлаб чиқариш ҳажмини ошириш режалаштирилган.
Президентга геология, аҳолини ичимлик суви билан таъминлаш, рақамлаштириш борасида амалга оширилаётган ишлар ҳақида маълумот берилди. Хусусан, ер қаъридан фойдаланиш бўйича ягона платформа ишга туширилди. Шаҳарсозлик лойиҳалари рақамлаштирилди. Қишлоқларда ягона коммунал тўлов лойиҳасини жорий этиш режалаштирилган. Сунъий интеллект ёрдамида геологик билимлар фондини яратиш бошланди.
Йиғилиш якунида Президент вазирга ўрта ва чуқур қайта ишланган маҳсулотлар ҳажмини ошириш, жорий йилда маҳаллий ишлаб чиқарувчиларнинг ягона реестрини яратиш, инвесторларни жалб этиш ишларини фаоллаштириш бўйича қатор топшириқлар берди.
Давлат раҳбари қурилиш ва уй-жой коммунал хизмат кўрсатиш соҳаларидаги жараёнларни фаол равишда рақамлаштириш, режалаштирилган турар-жой биноларини фойдаланишга топшириш, аҳолини иложи борича ичимлик суви билан таъминлаш муҳимлигини таъкидлади.
Шунингдек, ҚР Саноат ва қурилиш вазирига қайта ишлаш саноати объектларини ўз вақтида ишга тушириш бўйича топшириқлар берилди. Шунингдек, ер қаъридан фойдаланиш соҳасидаги ислоҳотларни ўз вақтида ва сифатли якунлаш вазифаси қўйилди.
Қасим-Жомарт Тоқаев маҳаллий ишлаб чиқарувчиларни қўллаб-қувватлаш бўйича чора-тадбирлар самарадорлигини қатъий назорат қилиш зарурлигини таъкидлади.
