Руслан Абдуллаевнинг рақиби тасдиқланди

TASHKENT. Kazinform - Тошкент вақти билан 20 апрель куни (АҚШда 19 апрель) тонг саҳарда АҚШнинг Калифорния штати Оушенсайд шаҳрида профессионал бокс турнири бўлиб ўтади, деб хабар беради Kazinform агентлиги ЎР профессионал бокс федерациясига таяниб.

Frontwave Arena мажмуаси мезбонлик қиладиган бокс оқшоми Оскар Де Ла Хойяга тегишли Golden Boy Promotions промоутерлик компанияси томонидан ташкил этилмоқда. Турнирнинг асосий жанги аёллар ўта енгил вазн тоифасида WBC, WBO ва IBF йўналишлари чемпиони Габриэла Фундора 15-13-0 (7 KO) ҳамда даъвогар Мэрилин Бадильо (19-1-0) ўртасида ўтказилади.

Ушбу оқшомда айнан Golden Boy Promotions промоутерлик компанияси мижози ҳисобланган супер енгил вазн тоифасидаги ўзбекистонлик боксчи Руслан Абдуллаев ўзининг профессионал рингдаги иккинчи жангида рингга кўтарилади. 22 яшар чарм қўлқоп устасининг рақиби филиппинлик Жино Родриго бўлади. Бу жанг расман ўз тасдиғини топди.

Маълумот учун, Родриго профессионал фаолияти давомида 19 та жанг ўтказиб, 13 ғалаба, 4 мағлубият ва 2 дуранг қайд этган. Руслан Абдуллаев шу йилнинг 7 март куни АҚШнинг Индио шаҳрида ташкил этилган турнирда профессионал боксда дебют қилган ва ўшанда мексикалик Хосе Валенсуэла Альварадони иккинчи раундда нокаут эвазига мағлуб этганди.

Эслатиб ўтамиз, Руслан Абдуллаевнинг профессионал боксдаги иккинчи жанги санаси маълум қилинган эди.