Россияда «Спутник V» вакцинаси билан эмланган 3 шифокорда коронавирус аниқланди
«Алтай ўлкасида коронавирусга қарши эмланган («Спутник V» вакцинаси) 42 нафар шифокорнинг уч нафари коронавирус билан касалланган. Вакцинация қилинган бемор шифокорларнинг иммунитети, эҳтимол COVID-19 патогенини учратган пайтгача шаклланиб улгурмаган бўлиши мумкин. Фақатгина шу шифокорларнинг касаллик юқтиришига сабаб бўлиши мумкин»,- дейилади хабарда.
Вакцинани ишлаб чиқувчиларининг сўзларига кўра, эмлаш иккита таркибий қисмдан иборат: одам биринчи эмлашдан кейин уч ҳафта ўтгач иккинчисини олади. Чунки бу вақт ичида иммунитетни шакллантириш процеси содир бўлади.
Минтақанинг юқумли касалликлар бўйича бош мутахассиси сўзларига кўра, Алтай ўлкасига 2021 йилнинг биринчи чорагида тахминан 2000 дозалик коронавирусга қарши вакцинасининг иккинчи партияси етказиб берилади.
Тезкор штаб маълумотларига кўра, ўтган кун давомида Алтай ўлкасида вируснинг 234 та янги ҳолати қайд этилган. Пандемия пайдо бўлганидан бери минтақада жами 21 499 киши коронавирус юқтирган.
