Россияда коронавирусга қарши оммавий эмлаш ноябрдан декабргача амалга оширилади

IRKUTSK. TASS - Kazinform - Россияда коронавирусга қарши оммавий эмлаш ноябрь-декабрь ойларида амалга оширилади. Бу ҳақда душанба куни Россия соғлиқни сақлаш вазири Михаил Мурашко Иркутскка ташрифи чоғида айтиб ўтди, деб хабар берди Kazinform Россиянинг ТАСС ахборот агентлигига таяниб.

Агентликнинг таъкидлашича, сентябрь ойида биринчилардан бўлиб хавф остида бўлганлар, яъни шифокорлар ва ўқитувчилар вакцинани олишади.

«Вакциналар юқори хавф остидаги одамларга сентябрь ойида етказиб берилади. Ноябрь-декабрь ойларида оммавий эмлаш режалаштирилган», - деди вазир.

Унга кўра, рўйхатдан ўтгандан кейинги тадқиқотлар шу ҳафта бошланади.

«Бу биз учун вакцинани батафсил ўрганиш имкониятидир. Вакцинанинг самарали эканлигини кўриб турибмиз. Шунга қарамай, биз уни чуқур ва ҳар томонлама ўрганмоқчимиз. Бизнинг ҳар бир беморимизнинг соғлиғи ҳар хил бўлгани учун уларнинг ҳар бири ўзига хос хусусиятларга эга», - дея тушунтирди у.