Россия музейларидаги қозоқларга тегишли ёдгорликлар мамлакатга қайтарилади
ASTANА. Кazinform - Россия музейларидаги қозоқларга тегишли ёдгорликларни қайтариш давлатлараро келишув доирасида ишлаб чиқилади. Бу ҳақда ҚР Маданият ва ахборот вазирлиги хабар берди.
“Турли сабабларга кўра хорижга кетган тарихий ёдгорликларни қайтариш муаммоси халқимизнинг маънавий тикланишига хизмат қилиши аниқ. Юқоридаги масаланинг аҳамиятини инобатга олган ҳолда вазирлик томонидан миллий тарих, архивлар, маданият соҳасидаги олимлар ва ижодкор зиёлилар вакиллари билан биргаликда беқиёс қадриятларимиз ва осори-атиқаларимиз рўйхатини шакллантириш масаласи ишлаб чиқилди”, — дейилади вазирликнинг агентлик расмий сўровига жавобида.
Вазирлик маълумотларига кўра, рўйхатга қўшни Россиядаги федерал музейлар фондидан олинган ёдгорликлар киритилган.
“Музейлар соҳасидаги мутахассисларнинг фикрича, бугунги кунда Россия музейларида XIX-XX асрларда Қозоғистон ҳудудида ўтказилган илмий экспедициялар давомида сотиб олинган ёки совға қилинган экспонатлар мавжуд. Ўз навбатида, бу нарсалар кўп ҳолларда қозоқ халқининг давлатчилик тарихида муҳим рол ўйнаган шахсларга тегишли. Шу боис, ушбу ёдгорликларни ёки уларнинг нусхаларини мамлакатга қайтариш масаласи икки давлат ўртасидаги давлатлараро келишув доирасида ўша давлат қонунчилиги асосида ишлаб чиқилади”, — дейилади вазирлик хабарида.
