Roche ва Pfizer Қозоғистонда дори ишлаб чиқаради
Соғлиқни сақлаш вазирлиги Қозоғистонда Roche ва Pfizer компаниялари томонидан ишлаб чиқарилган дори-дармонлар ҳақида тушунтириш берди, деб хабар беради Kazinform мухбири.
“Ҳозирда технологиялар трансфери ва янги ишланмаларни таъминлаш учун зарур бўлган инвестицияларни жалб қилиш бўйича ишлар олиб бориляпти. BIGPHARMA фармацевтика компанияси, шунингдек, АҚШ, Швейцария, Жанубий Корея, Туркия, Германия ва Япониянинг бошқа инвесторлари билан шартнома асосида ишлаб чиқариш лойиҳалари амалга ошириляпти. Мазкур лойиҳаларнинг Қозоғистон Республикаси ҳудудида амалга оширилиши инновацион ва ноёб дори воситаларини олиш ҳамда илғор тиббий асбоб-ускуналар имкониятларидан текин фойдаланиш имконини беради”, - дейилади Соғлиқни сақлаш вазирлигининг Kazinformга берган жавобида.
Хусусан, 2024 йилнинг иккинчи ярмидан бошлаб “Нобель Алмати фармацевтика заводи” АЖ негизида Roche компаниясининг саратонга қарши дори воситаларини ишлаб чиқариш режалаштирилган.
“Бундан ташқари, Pfizer компанияси билан Қозоғистон Республикаси ўртасида “Превенар-20” пневмококк вакцинасини изоляция қилиш лойиҳаси устида иш олиб борилмоқда. Ҳозирда инвестиция шартномаси лойиҳаси ишлаб чиқилмоқда. Вакцина ишлаб чиқаришни бошлаш муддати инвестиция шартномасида белгиланади”, - дейилади вазирлик хабарида.
Аввал хабар қилинганидек, Соғлиқни сақлаш вазирлиги мамлакатимиз дори воситалари ва тиббиёт буюмлари бозорида импорт улуши ҳақида маълумот берган эди.
“Қозоғистон Республикаси Стратегик режалаштириш ва ислоҳотлар агентлиги маълумотларига кўра, 2022 йилда фармацевтика саноатининг ишлаб чиқариш ҳажми 162,6 млрд тенгени ташкил этди. 2023 йилнинг 11 ойида маҳсулот ишлаб чиқариш ҳажми 131,0 млрд тенгени ташкил этди. Бундан ташқари, Молия вазирлиги маълумотларига кўра, 2022 йилда экспорт ҳажми 32,2 миллиондолларни, импорт эса 1,7 миллиард долларни ташкил этган. 2023 йилнинг 11 ойида эса фармацевтика саноати экспорти 14,4 миллион долларни, импорт эса 1,6 миллиард долларни ташкил қилди”, - дейилади вазирлик хабарида.
Муаллиф: Руслан Ғаббасов
