Президент транспорт-логистика соҳасига сунъий интеллектни жорий этишни таклиф қилди
ASTANA. Kazinform — Давлат раҳбари Кенгашнинг навбатдаги йиғилишида транспорт-логистика соҳасига сунъий интеллектни жорий этиш масаласини муҳокама қилишни таклиф қилди, деб хабар беради Ақорда.
Президентнинг фикрича, сифатли ишлаб чиқариш маълумотларисиз сунъий интеллектдан самарали фойдаланишнинг иложи йўқ.
У корхоналарда ишлаб чиқариш маълумотларининг катта захираси тўпланган бўлса-да, уларнинг сифати турлича ва маълумотлар тарқоқ ҳолда эканини айтди. Бундай маълумотларнинг аксарияти сунъий интеллект тизимларида фойдаланиш учун яроқсиз.
“Кенгашнинг аввалги йиғилишида маълумотларга асосланган моделга ўтиш ва соҳавий маълумотлар базаларини шакллантириш зарурлигини айтган эдим. Энди бу ишни ишлаб чиқариш соҳасида давом эттириш керак. Бизга ягона сифат стандартига мос, ўзаро боғланган ва хавфсиз фойдаланиш мумкин бўлган соҳавий ишлаб чиқариш маълумотлари керак. Мамлакатимиз тадқиқотчилари ва дастур ишлаб чиқувчилари улардан тўсиқларсиз фойдалана олишлари лозим. Албатта, тижорат сири, стратегик ахборот ва ўта муҳим маълумотлар ишончли ҳимоя қилиниши керак. Ҳукуматга бизнес ҳамжамияти билан биргаликда соҳавий ишлаб чиқариш маълумотлар базасини шакллантиришнинг ягона ёндашувларини ишлаб чиқиш вазифаси юкланади. Мамлакатимизда технологик ечимларни ишлаб чиқишда мазкур маълумотлардан амалда фойдаланишга устувор аҳамият бериш лозим”, — деди Қасим-Жомарт Тоқаев.
Давлат раҳбари Қозоғистон сунъий интеллектни ривожлантириш учун мустаҳкам пойдевор яратганини айтди. Эндиги вазифа — ушбу салоҳиятни иқтисодий манфаатга айлантириш.
“Сунъий интеллект мамлакат саноатини ривожлантирадиган восита бўлиши керак. Қозоғистоннинг бунинг учун имкониятлари етарли. Мазкур ишни стратегик аҳамиятга эга бўлган секторларда янада кучайтириш зарур. Шу муносабат билан Кенгашнинг навбатдаги йиғилишида транспорт-логистика соҳасига сунъий интеллектни жорий этиш масаласини муҳокама қилишни таклиф қиламан. Бу секторни янада модернизация қилиш унинг салоҳияти ва самарадорлигини оширади ҳамда Қозоғистоннинг транзит имкониятларини янада мустаҳкамлайди”, — деди Президент.
