Президент: Қозоғистон ва Ўмон инвестиция имкониятларини бирлаштиради
ASTANА. Кazinform — Президент Қозоғистон-Ўмон бизнес форумида нутқ сўзлади. Бу ҳақда Ақорда хабар берди.
Қозоғистон-Ўмон бизнес форуми Ўмон Султони Ҳайсам бин Ториқ Ол Саиднинг мамлакатга давлат ташрифи доирасида бўлиб ўтди. Учрашувда икки мамлакатнинг етакчи компаниялари ва бизнес ҳамжамияти вакиллари иштирок этди.
Қасим-Жомарт Тоқаев форумдаги нутқида ўзаро ишонч ва тушуниш руҳида ўтказилган олий даражадаги музокаралар очиқ, холис ва чинакам мазмунли бўлганини таъкидлади.
Давлат раҳбари Қозоғистон ва Ўмон ўртасидаги савдо-иқтисодий ва инвестиция алоқаларини ривожлантириш учун тегишли шартномавий-ҳуқуқий базани ҳамда институционал асосларни мустаҳкамлаш зарурлигини таъкидлади.
Президент Инвестицияларни рағбатлантириш тўғрисидаги битимнинг муҳимлигини таъкидлади. Ушбу битим доирасида лойиҳаларни амалга ошираётган инвесторларга янада тушунарли, шаффоф ва ишончли шароитлар яратилмоқда.
Шунингдек, икки мамлакат бизнес ҳамжамиятлари ўртасида тўғридан-тўғри алоқаларни ривожлантиришга алоҳида эътибор қаратилди.
— Ишончим комилки, Қозоғистон-Ўмон ишбилармонлар кенгаши бизнес вакиллари ўртасида фаол ҳамкорлик қилиш учун платформа бўлади, — деди Президент.
Давлат раҳбарининг сўзларига кўра, самарали молиявий механизмлар Қозоғистон ва Ўмоннинг умумий мақсадларини қўллаб-қувватлайди.
— Биз “Самруқ-Қазна” АЖ ва Ўмон Инвестиция бошқармаси ўртасида қўшма инвестиция тузилмасини ишга тушириш тўғрисидаги битим имзоланганини олқишлаймиз. Ушбу муҳим ташаббус молиявий имкониятларни бирлаштириш ва қўшимча инвестицияларни жалб қилиш имконини беради. Шунингдек, биз Ўмоннинг яқинда ташкил этилган Халқаро молия маркази билан ҳамкорликни йўлга қўйиш мумкинлигига ишонамиз. Икки мамлакат молия институтлари ўртасида тўғридан-тўғри алоқа инвестиция имкониятларини очади, — деди Президент.
