Президент Қатар Амири билан музокара ўтказди
ASTANА. Кazinform - Давлат раҳбари Қатар Амирининг таклифини катта миннатдорлик билан қабул қилганини айтди. Президент бу давлатга биринчи марта давлат ташрифи билан келаётгани, шу боис бу алоҳида аҳамиятга эга эканини таъкидлади.
– Қатар ислом оламидаги ишончли ва муҳим ҳамкоримиздир. Ўйлайманки, икки давлат ўртасидаги муносабатларга янги суръат бағишлаш вақти келди. Қозоғистон ва Қатар ўртасидаги муносабатларни тўлиқ стратегик шериклик даражасига кўтаришни таклиф қиламан. Ташриф давомида жуда муҳим ҳужжатлар имзоланади. Бу келишувлар ҳамкорлигимизни стратегик даражага кўтаради. Қатар биз учун жуда алоҳида давлат ва биз сизлар билан алоқаларимизни қадрлаймиз. Шунинг учун биз бу муносабатларни янада ривожлантиришга ҳаракат қиламиз. Меҳмондўстлигингиз учун миннатдормиз, - деди Қасим-Жомарт Тоқаев.
Қатар Давлати Амири Шайх Тамим бин Ҳамад Ол Соний Қозоғистон Президентининг ташрифи муҳимлигини таъкидлади.
– Жаноб Президент, биринчи давлат ташрифингиз билан мамлакатимизга келаётганингиздан хурсандман. Бугунги музокаралар икки давлат ўртасидаги муносабатларни янада юксалтиришига ишонаман. Астанада ҳам учрашдик. Бугунги учрашув аввалги музокаралар асосида эришилган келишувлар ижросини назорат қилиш, истиқболдаги режаларни белгилаш имконини бермоқда. Икки томонлама ҳамкорлик доирасида энергетика, савдо-иқтисодий ва сармоявий лойиҳаларни амалга оширишдан манфаатдормиз. Ушбу ташриф давомида Сиз мамлакатимизнинг йирик бизнес вакиллари билан учрашувлар ўтказасиз. Ишончим комилки, бу ушбу соҳалардаги ҳамкорликни ривожлантиришга янги суръат бағишлайди, - деди Қатар Давлати Амири.
Давлат раҳбари Қозоғистон-Қатар муносабатлари сўнгги 30 йилдаги энг яхши даврни бошдан кечираётганини таъкидлаб, амирнинг Астанага давлат ташрифини эслади.
Президент таъкидлаганидек, мамлакатлар ўртасида яқин сиёсий мулоқот, кенгайиб бораётган иқтисодий шериклик ва муваффақиятли маданий-гуманитар алоқалар йўлга қўйилган. Икки давлат ўртасида сўнгги уч йилда имзоланган шартномалар турли соҳалардаги ҳамкорликни янада мустаҳкамлаш учун мустаҳкам пойдевор бўлди.
Қасим-Жомарт Тоқаев Қатар яқин келажакда Қозоғистоннинг энг йирик ўнта инвестори қаторига киришига ишонишини айтди. Президент Қозоғистон Қатар бозорига умумий қиймати 250 миллион доллар бўлган 60 турдаги нохомашё экспортини кўпайтиришга тайёрлигини билдирди. Шу билан бирга, яқин келажакда товар айланмасини 500 миллион долларга етказиш ҳақида сўз юритилди.
Музокара чоғида қишлоқ хўжалиги, транспорт-логистика, туризм каби масалалар муҳокама қилинди. Хусусан, Давлат раҳбари Қатарни Форс кўрфази ва Марказий Осиёни боғловчи интермодаль транспорт тармоғини ривожлантириш бўйича саъй-ҳаракатларни бирлаштиришга чақирди. Бу минтақада иқтисодий фаолликни рағбатлантиришга хизмат қилади. 2030 йилга бориб суғориладиган ерлар ҳажмини 3 миллион гектарга етказишни режалаштираётган мамлакат бугунги кунда буғдой ва ун етиштириш бўйича жаҳонда етакчи ўнталикдан жой олган. Қасим-Жомарт Тоқаев қишлоқ хўжалиги соҳасида ҳамкорликни кенгайтириш учун асослар мавжудлигига эътибор қаратди.
Шу билан бирга, маданий-гуманитар алоқаларни мустаҳкамлаш масаласи ҳам муҳокама қилинди. Давлат раҳбари 2025 йилда Қозоғистон ва Қатар маданият кунларини икки давлат пойтахтларида ташкил этишни таклиф қилди. Бу тадбирлар бой маданий меросга эга халқларни янада яқинлаштиришига ишонч билдирди.
Бундан ташқари, минтақавий ва халқаро кун тартибидаги долзарб масалалар кўриб чиқилди.
