Португалиядаги ўрмон ёнғинлари сабабли 1000 дан ортиқ одам эвакуация қилинди

ODEMIRA. Kazinform – Португалия жанубида давом этаётган ўрмон ёнғинлари туфайли 1400 киши эвакуация қилинди. Минг гектардан ортиқ ер ёнди, деб хабар беради Kazinform Reuters агентлигига таяниб.

Алентежу вилоятидаги Одемира муниципалитетида шанба куни бошланган ўрмон ёнғинлари жанубга, Португалиянинг асосий сайёҳлик жойларидан бири бўлган Алгарве томон тарқаляпти. Қайд этилишича, ёнғинни ўчиришга 800 дан ортиқ ўт ўчирувчилар жалб этилган.

Ҳавонинг юқори ҳарорати ва кучли шамол 6700 гектарга яқин майдонни вайрон қилган ёнғинга қарши курашни қийинлаштиряпти.

Эҳтиёт чораси сифатида жами 19 та кичик қишлоқ ва тўртта сайёҳлик жойидан дам олувчилар эвакуация қилинди.

Расмийларнинг айтишича, бир қанча йўллар ёпилган.

Португалия каби Жанубий Европа мамлакатлари бу ёзда сайёҳлик мавсумининг энг юқори ҳароратини бошдан кечирди. Олимларнинг таъкидлашича, иссиқ тўлқинлар иқлим ўзгариши сабабли тез-тез ва кучлироқ бўлиб боряпти.

Португалия метеорология агентлиги IPMA душанба куни мамлакатнинг олти минтақасида, жумладан, пойтахт Лиссабонда иссиқлик ҳақида огоҳлантирди.

Мамлакат ҳукумати Португалия бўйлаб 120 дан ортиқ муниципалитетларни ўрмон ёнғинлари хавфи юқори деб эълон қилди.

Сешанба куни Португалия шимолидаги учта минтақада жазирама туфайли қизил огоҳлантириш эълон қилинди. Каштелу-Бранкуда ҳаво ҳарорати Цельсий бўйича 41 даражага етиши кутиляпти.