Польшада фермерлар норозилик намойишларини бошладилар
ASTANA. Kazinform — Варшавада польшалик фермерлар Украинадан қишлоқ хўжалиги маҳсулотлари импорт қилинишига, шунингдек, Европа экологик стандартларига қарши норозилик намойишларини бошладилар.
Uza.uz порталининг хабар беришича, Польша фермерлари Варшавадаги Еврокомиссия ваколатхонаси олдида норозилик акцияси ўтказмоқда. Бу ҳолат Польша 2025 йилнинг ўрталарига қадар Европа Иттифоқига раислик қилган пайтга тўғри келди.
Польша деҳқонлари Украинадан қишлоқ хўжалиги маҳсулотлари импорт қилинишига, Европа экологик стандартлари ва мамлакатда иқтисодий кўрсаткичларнинг пасайишига қарши норозилик билдирмоқда.
Фермерларнинг норозилигига овчилар жамияти вакиллари ҳам қўшилди. Улар Европа Иттифоқи ва ҳукуматнинг ўрмондан фойдаланиш ва овчилик борасидаги сиёсатига норозилик билдирмоқда.
Намойиш Варшава марказидаги Ясная кўчасида бошланиб, марказий кўчалар бўйлаб давом этди. Польша пойтахти полиция бошқармаси деҳқонлар юриши муносабати билан бир қанча кўчаларда транспорт ҳаракати тўхтатилганини маълум қилди.
Ўз навбатида, Польша Қишлоқ хўжалиги ва озиқ-овқат вазирлиги раҳбари Чеслав Секерски фермерларни иш жойида кутаётганини ва уларнинг талабларини тинглашга тайёрлигини билдирди.
Эслатиб ўтамиз, ноябрь ойида польшалик фермерлар Украина билан чегарадаги “Медика-Шегини” назорат-ўтказиш пунктидан ўтувчи йўлни юк машиналари учун тўсиб қўйган эди.
