Покистонликлар Қозоғистон пиёзини кўпроқ сотиб олиши мумкин

ASTANА. Кazinform - Бугунги кунда Қозоғистонда 130 минг тоннага яқин пиёз мавжуд бўлиб, уларнинг асосий қисми Жамбил вилоятига тегишли. Шу билан бирга, Қозоғистон Республикаси Қишлоқ хўжалиги вазирлиги Покистон, Россия ва Болтиқбўйи мамлакатларига пиёз экспорт қилиш масаласини ишлаб чиқмоқда.

Бу ҳақда Марказий коммуникациялар хизматида бўлиб ўтган давра суҳбатида ҚР Қишлоқ хўжалиги вазири ўринбосари Ербол Тасжуреков маълум қилди.

– Бу масала ҚР Савдо ва интеграция вазирлиги билан биргаликда ишлаб чиқилмоқда. Пиёзни ташқи бозорда сотишни таъминлаш «QazTrade» Савдо сиёсатини ривожлантириш маркази” АЖга юклатилди. Бугунги кунда Покистон, Россия ва Болтиқбўйи мамлакатларига пиёз етказиб бериш фаол давом этмоқда, - деди Ербол Тасжуреков.