Покистонлик талаба WhatsAppдаги хабари учун ўлимга ҳукм қилинди

ASTANA. Kazinform – Покистон суди 22 ёшли талабани WhatsApp хабарлари орқали куфр келтирганликда айблаб, ўлимга ҳукм қилди, деб хабар беради BBC.

Панжоб провинцияси суди маълумотларига кўра, айбланувчи фотосурат ва видеоларни мусулмонларнинг диний эътиқодига зарар етказиш мақсадида тарқатган.

Бу иш бўйича 17 ёшли яна бир ўсмир умрбод қамоқ жазосига ҳукм қилинди. Айбланувчи икки фуқаро ҳам ўз айбига иқрор бўлмаган.

Покистонда куфр ўлим билан жазоланади. Айрим гумонланувчилар иши судгача етиб боргунча жазоланган.

Шикоят 2022 йилда Покистон Федерал Тергов Агентлигининг (FIA) Кибержиноятларга қарши кураш бўлими томонидан Панжоб провинциясининг пойтахти Лаҳор шаҳрида берилган.

Суд қарорига кўра, 22 ёшли йигит Муҳаммад пайғамбар ва унинг рафиқларини ҳақорат қилувчи сурат ва видео олгани учун ўлим жазосига ҳукм қилинган.

Иккинчи айбланувчи материални тарқатгани учун умрбод қамоқ жазосига ҳукм қилинди.

Шикоятчи уч хил мобиль телефон рақамидан видео ва фотосуратлар олганини айтди.

FIA ходимлари шикоятчининг телефонини текшириб, унга “одобсиз материаллар” юборилганини аниқлашган.

Ёшларнинг адвокатлари уларни “тузоққа” тушиб қолганини айтишди.

ўлим жазосига маҳкум қилинган судланувчининг исми ошкор қилинмаган. Унинг отаси ВВСга Лаҳор Олий судига шикоят қилишини айтди.

Куфрга қарши қонунлар биринчи марта Ҳиндистоннинг Британия ҳукмдорлари томонидан қабул қилинган ва 1980 йилларда Покистон ҳарбий ҳукумати остида кенгайтирилган.

Ўтган йилнинг август ойида икки насроний Қуръонни таҳқирлашда айбланганидан сўнг шарқдаги Жаранвала шаҳрида ўнлаб черков ва уйлар ёқиб юборилган эди.