Павлодар вилоятига 730 миллиард тенгедан ортиқ инвестициялар жалб этилди

Павлодар вилоятига 730 миллиард тенгедан ортиқ инвестициялар жалб этилди
Фото: Валерий Бугаев

Павлодар вилоятида жорий йилда барча асосий ижтимоий-иқтисодий кўрсаткичлар ижобий динамикани кўрсатди. Бу ҳақда вилоят раҳбари Асайин Байханов маълум қилди, деб хабар беради Kazinform.

Унинг таъкидлашича, Қозоғистонда ишлаб чиқарилаётган электр энергиянинг 42,5 фоизи, кўмирнинг деярли 60 фоизи Павлодар вилоятига тегишли.

“Ўтган йилнинг шу даврига нисбатан жалб қилинган инвестициялар ҳажми 28,2 фоизга ошиб, 730,1 миллиард тенгени ташкил этди. Инвестицияларнинг ўсиш суръатлари бўйича вилоятимиз республикада тўртинчи ўринда туради. Шуни алоҳида таъкидлаш жоизки, уларнинг 85 фоизи хусусий инвестициялардир”, – деди ҳоким Марказий коммуникациялар хизматида бўлиб ўтган матбуот анжуманида.

Унга кўра, йил охиригача 800 га яқин янги иш ўрни яратиш билан умумий қиймати 291 миллиард тенге бўлган 20 та лойиҳани ишга тушириш режалаштирилган.

Умуман олганда, вилоят ҳокимликлари томонидан 10 мингга яқин янги иш ўринлари яратиш, умумий қиймати 2,1 триллион тенге бўлган 127 та инвестиция лойиҳалари жамланмаси устида иш олиб борилмоқда.

Шу билан бирга, Асайин Байханов вилоятда атроф-муҳитни муҳофаза қилиш бўйича комплекс ечимларга босқичма-босқич ўтиш бўйича ишлар олиб борилаётганини алоҳида таъкидлади. Шундай қилиб, жорий йилнинг 9 ойида атмосферага чиқинди газлар ҳажми ўтган йилнинг шу даврига нисбатан деярли 2,6 фоизга ёки 13,2 минг тоннага камайди. 2022 йилда чиқиндилар 726,5 минг тоннани ташкил этди.

Сўнгги хабарлар