Парламент таътилга чиққан пайтда ҳам ишимиз тўхтамайди – ҚР Сенати раиси
«Бугун саккизинчи чақириқ Парламентнинг биринчи сессияси доирасида биз Сенатнинг якуний йиғилишини ўтказдик. Сессия март ойининг охирида бошланган. Шунга қарамай, бу даврда Давлат раҳбари томонидан мамлакатимизни модернизация қилишга қаратилган қонунчилик ислоҳотларини таъминлаш борасида кенг кўламли ишлар амалга оширилди. Парламент уч ой ичида 25 та қонун қабул қилди. Улардан 10 таси депутатлик корпуси ташаббуси билан қабул қилинган қонунлардир», — деди М. Ашимбаев.
Сенат раиси ҳудудлар билан ўзаро ҳамкорликни кучайтиришга қаратилган ишлар самараларига ҳам тўхталди. Сессия давомида маҳаллий вакиллик органлари билан ўзаро ҳамкорлик бўйича кенгаш ҳамда «Ҳудуд» депутатлар гуруҳи таркиби янгиланиб, йиғилишлари ўтказилганини таъкидлади.
Маулен Ашимбаевнинг сўзларига кўра, ушбу сессия давомида депутатларнинг қонун ижодкорлиги ҳуқуқларини амалга оширишни қўллаб-қувватлашнинг янги механизми – Сенат Лойиҳа идораси яратилди. Сенат ҳузуридаги «Ёш экспертлар клуби»нинг йиғилишлари ҳам мунтазам ўтказиб келинмоқда. Давлат раҳбари топшириғига кўра, Парламентда Қозоғистон халқи Ассамблеясидан сайланган депутатлар киритилган «Бир давлат – бир манфаат» депутатлар гуруҳи тузилди. Шунингдек, Барқарор ривожланиш мақсадлари мониторинги бўйича Парламент комиссиясининг биринчи йиғилиши бўлиб ўтгани ҳам маълум.
«Президентимизнинг қонунчиликдаги ислоҳотларини сифатли ва ўз вақтида амалга ошириш Сенатнинг муҳим вазифаларидан биридир. Эртага палаталарнинг қўшма мажлиси бўлиб ўтади. У биринчи сессия ишини якунлайди, сўнгра Парламент таътилга чиқади. Маълумки, Парламент таътилга чиққан пайтда ҳам ишимиз тўхтамайди. Палатамиз ҳудудлар манфаатларини ҳимоя қилувчи асосий институтдир. Шу боис ҳудудларга ташриф буюрганингизда, халқ билан фаол учрашиб, жойлардаги долзарб масалаларни ҳар томонлама таҳлил қиласиз, деб ўйлайман», — деди Маулен Ашимбаев.
Эслатиб ўтамиз, 27 июнь куни Қозоғистон Республикаси Парламентининг биринчи сессиясида Мажилис раиси Ерлан Қошанов VIII палата ишини сарҳисоб қилган эди.
30 июнь куни Парламент палаталарининг қўшма мажлиси бўлиб ўтади ва Парламентнинг биринчи сессияси расман ёпилади.
Муаллиф: Руслан Ғаббасов
