Осиё жаҳон технология бозоридаги ўз мавқеини мустаҳкамламоқда
ASTANA. Kazinform — Шарқий ва Жануби-Шарқий Осиё мамлакатлари сунъий интеллект ва яримўтказгичларга бўлган талабнинг ортиши туфайли юқори технологияли маҳсулотларнинг глобал етказиб бериш занжиридаги ўз ўрнини мустаҳкамламоқда. Бу ҳақда Kazinform агентлиги Jiji Press нашрига таяниб хабар беради.
Минтақа халқаро технология компанияларини жалб этмоқда, маълумотларни қайта ишлаш инфратузилмасини ривожлантирмоқда ва ушбу соҳа учун зарур мутахассислар тайёрлаш кўламини кенгайтирмоқда. Бу жараёнларда Япония ҳам иштирок этиб, минтақа мамлакатлари билан технология ва таълим соҳаларидаги ҳамкорликни ривожлантирмоқда.
Ушбу ўзгаришларга таъсир кўрсатаётган омиллардан бири — АҚШ ва Хитой ўртасидаги савдо-иқтисодий зиддиятларнинг кучайиши туфайли ишлаб чиқариш корхоналари ва етказиб бериш занжирларини диверсификация қилишдир. Компаниялар айрим бозорларга қарамликни камайтириш ва ишлаб чиқариш географиясини кенгайтиришга интилмоқда. Бу борада Жануби-Шарқий Осиё мамлакатларига ҳам устувор аҳамият берилмоқда.
Малайзиянинг Жоҳор штати маълумотларни қайта ишлаш инфратузилмасини ривожлантириш бўйича муҳим марказлардан бирига айланиб бормоқда. Бу ерда Microsoft, Nvidia ва NTT Data каби йирик халқаро компаниялар ўз фаолиятини кенгайтирмоқда.
NTT Data умумий қуввати 290 мегаватт бўлган маълумотларни қайта ишлаш марказлари мажмуасини қурмоқда. Унинг биринчи объектини 2027 йил апрель ойида фойдаланишга топшириш режалаштирилган. Бундай марказлар сонининг кўпайишига сунъий интеллект тизимларининг ҳисоблаш қувватига бўлган талаб ортиб бораётгани сабаб бўлмоқда.
Вьетнам ҳам халқаро яримўтказгичлар бозоридаги ролини кучайтирмоқда. АҚШнинг Intel компанияси ишлаб чиқариш операцияларининг бир қисмини Коста-Рикадаги корхонасидан Хошимин шаҳридаги майдонга кўчиришни режалаштирмоқда. Жанубий Кореянинг Samsung Electronics компанияси эса Вьетнамда хотира микросхемаларини ишлаб чиқариш, синовдан ўтказиш ва қадоқлаш жараёнларини ривожлантирмоқда.
Янги лойиҳага дастлаб 1,5 миллиард доллар инвестиция киритиш кўзда тутилган. Корхона 2027 йил ноябрь ойида иш бошлаши мумкин.
Шунингдек, юқори технологияли соҳалар учун зарур мутахассисларни тайёрлашнинг аҳамияти ортиб бормоқда. Вьетнам 2030 йилгача яримўтказгичлар соҳасида 50 минг нафар мутахассис тайёрлашни мақсад қилган. 2025 йил октябрь ойида Вьетнам-Япония университетида ушбу йўналиш бўйича махсус таълим дастури ишга туширилди.
Япониянинг мутахассислар тайёрлаш жараёнидаги иштироки минтақа технологик салоҳиятини оширишда халқаро ҳамкорлик муҳим аҳамиятга эга эканини кўрсатмоқда.
Аввалроқ Қозоғистон таълим соҳасида Марказий ва Жанубий Осиёда етакчилик қилаётгани ҳақида хабар берган эдик.
