Осиё ўйинлари: Бугун Қозоғистон терма жамоасидан тўрт нафар боксчи рингга кўтарилади

Бугун, 1 октябрь куни Қозоғистон терма жамоасидан тўрт нафар боксчи Ханчжоу (Хитой) шаҳрида бўлиб ўтаётган Осиё ўйинларида иштирок этади. Бу ҳақда Kazinform Sports.kzга таяниб хабар беради.

Кундузги сессияда Қозоғистондан икки нафар спортчи иштирок этади. Астана вақти билан 13:15 да Наталья Богданова майдонга тушади. 66 кг вазн тоифасида иштирок этаётган спортчи чорак финалда мўғулистонлик Цэцэгдари Мягмарсурэнга қарши рингга чиқади.

Соат 14:45да 92 кггача бўлган вазн тоифасида Сағиндиқ Тоғамбай ярим финал жангини ўтказади. У хитойлик Хань Сюэчжэнь билан жанг қилади. Бу жангларни жонли эфирда Qazaqstan телеканалида кўриш мумкин.

Кечки сессияда Қозоғистоннинг икки нафар спортчиси рингга чиқади. Соат 17:15 да Карина Ибрагимова 57 кггача бўлган вазн тоифасида мўғулистонлик Намуун Монхор билан чорак финал жангини ўтказади.

Соат 19:00да Ертуған Зейнуллинов 63,5 кг вазн тоифасида чорак финалда Мўғулистоннинг яна бир вакили Чинзориг Баатарсухиин билан учрашади. Qazsport телеканали ушбу жангларни жонли эфирда намойиш этади.

Қозоғистон терма жамоасининг 30 сентябр кунги натижаларига келсак, бокс бўйича Қозоғистон терма жамоаси сардори (71 кг) Асланбек Шимбергенов Осиё ўйинларининг ярим финалига чиқди. У жаҳон чемпиони ўзбекистонлик Асадхўжа Мўйдинхўжаевни нокаут билан мағлуб этди.

Қамшибек Қонқабаев (+92 кг) баҳрайнлик боксчи Данис Латиповни 5:0 ҳисобида енгиб, Осиё ўйинларининг ярим финалига ишончли тарзда йўл олди.

Мусобақанинг 7-куни натижаларига кўра, Қозоғистон терма жамоаси ҳисобида 3 та олтин, 4 та кумуш ва 19 та бронза бор.