Олжас Бектенов Société Générale банки вакиллари билан мамлакатга маблағ жалб этиш масаласини муҳокама қилди

ASTANA. Kazinform - Қозоғистон Бош вазири Олжас Бектенов халқаро Société Générale банкининг Яқин Шарқ, Туркия/МДҲ, Африка минтақаси бўлими раҳбари Эмрик Арно ҳамда Марказий Осиё давлатлари ва Кавказ минтақаси раҳбари Тейба Гулиевалар билан учрашди.

Учрашувда инвестиция лойиҳаларини амалга ошириш доирасидаги жорий ҳамкорлик масалалари муҳокама қилинди. 1864 йилда асос солинган Société Générale - 66 мамлакатда ваколатхонасига эга йирик халқаро молия институтларидан биридир. Қозоғистон Ҳукумати ва Банк ўртасидаги 30 йиллик ҳамкорлик давомида умумий қиймати 17 миллиард доллардан ортиқ бўлган 30 дан ортиқ қўшма лойиҳа амалга оширилган.

Айни пайтда Қозоғистоннинг бир қатор компаниялари Société Générale банки билан энергетика инфратузилмаси ва молия бозори соҳасидаги лойиҳалар бўйича музокаралар олиб бормоқда. Бундан ташқари, йиғилиш иштирокчилари иқтисодиётнинг барча жабҳаларида барқарор ривожланишни интеграциялаш мақсадида ESG (экологик муҳит, давлат хизмати, корпоратив бошқарув) йўналишидаги ҳамкорликни ривожлантириш истиқболларини муҳокама қилдилар.

“Давлат раҳбари Қасим-Жомарт Тоқаев таъкидлаганидек, Қозоғистонга хорижий инвестициялар оқимини таъминлаш учун халқаро банкларни фаол жалб қилиш зарур. Бу йўналишда Ҳукумат ўзаро манфаатли ҳамкорликка тайёр ва мамлакатимиз учун муҳим лойиҳаларни амалга оширишни қўллаб-қувватлайди”, - деди Олжас Бектенов.

Давлат раҳбарининг Қозоғистон халқига Мурожаатномасида белгиланган вазифаларни амалга ошириш мақсадида иқтисодиётга хорижий манбалар, жумладан, молия соҳасида рақобатни кучайтириш мақсадида ишончли халқаро банклардан маблағ жалб этиш учун қулай шарт-шароитлар яратиш бўйича комплекс чора-тадбирлар амалга оширилмоқда. Амалга оширилаётган ишлардан мақсад халқаро бозорда тажрибага эга, иқтисодиётни кредитлашда фаол иштирок эта оладиган банкларни Қозоғистонга жалб этишдан иборат.