Олимпиада чемпиони Диёрa Келдиёрова икки йиллик танаффусдан сўнг Қозоғистонда мусобақада иштирок этади
ASTANA. Kazinform — Париж Олимпиадаси чемпиони, ўзбекистонлик дзюдочи Диёрa Келдиёрова узоқ танаффусдан сўнг мусобақаларга қайтмоқда. Бу ҳақда Іnformsports.kz хабар берди.
17-18 октябрь кунлари Ақтау шаҳридаги «Халық Арена» спорт мажмуасида Тўрар Жолдибаев хотирасига бағишланган дзюдо бўйича Осиё очиқ кубоги (Aktau Asian Open 2026) бўлиб ўтади.
Қозоғистон дзюдо федерацияси маълумотига кўра, нуфузли мусобақада Париж Олимпиадаси чемпиони Диёрa Келдиёрова ҳам иштирок этади. Ўзбекистонлик спортчи 52 килограммгача бўлган вазн тоифасида беллашади.
Бу Келдиёрова учун 2024 йилги Олимпия ўйинларидан кейинги илк расмий мусобақа бўлади. Олимпиададаги тарихий ғалабасидан сўнг у она бўлди ва спорт фаолиятида танаффус қилди.
Эслатиб ўтамиз, Диёрa Келдиёрова 2024 йилда Парижда бўлиб ўтган Олимпия ўйинларида олтин медални қўлга киритган. Шунингдек, у жаҳон чемпионатларининг икки карра кумуш медали совриндори ва Осиёнинг икки карра чемпиони ҳисобланади.
Ақтаудаги халқаро мусобақада Қозоғистон, Ўзбекистон, Озарбайжон, Беларусь, Қирғизистон, Черногория ва Россиядан тахминан 230 нафар спортчи иштирок этиши кутилмоқда.
Турнирда медаллар билан бир қаторда халқаро рейтинг очколари ҳам ўйналади. Жумладан, олтин медаль соҳибига 100, кумуш медаль совриндорига 70, бронза медали соҳибига эса 50 очко берилади.
Диёрa Келдиёрова 17 октябрда татамига чиқади. Олимпия чемпионининг узоқ танаффусдан кейинги илк беллашувлари Ақтаудаги мусобақанинг асосий воқеаларидан бири бўлиши кутилмоқда.
