Ольга Рипакова Қозоғистон енгил атлетика федерациясини бошқаради
TASHKENT. Kazinform - ҚР Туризм ва спорт вазири Ербол Мирзабосинов иштирокида Қозоғистон енгил атлетика федерациясининг 2024 йил учун якуний йиғилиши бўлиб ўтди, дея хабар беради Кazinform вазирлик матбуот хизматига таяниб.
Тадбирда Енгил атлетика федерацияси президенти Даниал Ахметов, ҳудудий федерациялар раҳбарлари, спортчилар ва федерация вакиллари иштирок этди.
Йиғилишда Даниал Ахметов Федерация томонидан амалга оширилган ишлар юзасидан ҳисобот бериб, бир қатор муҳим ютуқларни қайд этди. Қозоғистонлик спортчиларнинг халқаро мусобақаларда қўлга киритаётган юксак натижалари ва ғалабалари, енгил атлетикани ривожлантиришга қаратилган янги ташаббуслари шулар жумласидандир.
Йиғилишда Даниал Ахметов ўз ваколатлари муддатидан олдин тугатилишини маълум қилди ва таниқли спортчи, Рио-де-Жанейро Олимпиадаси чемпиони Ольга Рипаковани Федерация президентлигига номзод қилиб кўрсатишни таклиф қилди. Йиғилиш иштирокчилари, жумладан, вилоят федерациялари, спорт жамоатчилиги раҳбарлари унинг номзодини бир овоздан қўллаб-қувватлади.
Вазир Ербол Мирзабосинов Даниал Ахметовга Федерация президенти сифатидаги самарали фаолияти учун миннатдорчилик билдириб, Ольга Рипаковага янги лавозимида муваффақиятлар тилади.
Йиғилиш якунида вазир Ольга Рипаковага енгил атлетика бўйича халқаро ҳамкорликни ривожлантириш, спортчилар ва захира мутахассисларини тайёрлашга алоҳида эътибор қаратиш бўйича топшириқ берди.
